Хятадын Шаньси мужид панда хэлбэртэй нарны цахилгаан станцыг байгуулсан байна. 50 мегаватт хүчин чадал бүхий энэ станцыг Panda Green Energy компани НҮБ-ын Хөгжлийн хөтөлбөрийн тусламжтайгаар бүтээсэн аж.

Агаараас харахад тод ялгарч буй пандагийн биеийн хар бараан хэсгүүдийг кристалл ялтасаар, харин саарал, цагаан хэсгүүдийг нимгэн ялтасаар хийсэн бөгөөд нарны энэхүү фермийн төслийн бүрэн хүчин чадал нь 100 мегаватт болох талаар Inhabitat мэдээлжээ.

Энд зөвхөн цахилгаан эрчим хүч үйлдвэрлэхээс гадна сэргээгдэх эрчим хүчний асуудлаар хүүхэд залууст зориулсан сургалтын төв нээхээр төлөвлөж байгаа аж. Мөн Panda Green Energy компани иймэрхүү чиглэлийн хэд хэдэн байгууламжийг бүтээхээр зорилт тавин ажиллаж байгаа бөгөөд 25 жилийн дараа гэхэд, 3,2 тэрбум киловатт/цаг эрчим хүч үйлдвэрлэдэг болсноор нэг тэрбум гаруй тонн нүүрс хэмнэж, агаар мандалд 2,74 сая тонн нүүрсхүчлийн хий цацахаас сэргийлж чадах аж. 

Д.Мөрөн

Эх сурвалж: ZONE.MN