Одоогоос хоёр жилийн өмнө буюу 2017 оны 9 дүгээр сарын 20-ны өдөр Нийслэлийн Зорчигч Тээврийн Нэгтгэлийн дарга Г.Төмөрбаатарыг албан тушаалаасаа огцрохыг ажилчид нь шаардан мэдээлэл хийж байсан удаатай. Угтаа бол энэхүү хурган дарга ажилчдынхаа эрх ашгийг уландаа гишгэж олон ч хууль бус үйл ажиллагаа явуулсаар ирсэн хэмээн тухайн үед Монголын тээвэр холбоо, Газрын тосны үйлдвэрчний эвлэлийн холбоо болон тус газрын ажилчдын төлөөлөл олон нийтэд мэдээлж байв.

Гэтэл иймэрхүү ёс зүйн алдаа гаргасан хүнийг Нийслэлийн Засаг даргын орлогч болох гэж буй тухай мэдээлэл хэвлэлээр гарч эхэллээ. Учир нь Улаанбаатар хотын захирагч С.Амарсайхан Хөгжлийн бодлого, Хүний хөгжил, нийгмийн бодлого хариуцсан хоёр орлогчтой байх тухай асуудал яригдсан. Мөн Хот байгуулалт, Инноваци, технологи, Агаар, орчны бохирдол, Зам, тээвэр хариуцсан төсөл, хөтөлбөрийн удирдагчдыг Засаг даргын орлогчтой дүйцэх төвшинд ажиллуулахаар болсоноо мэдэгдсэн.

Яг үнэндээ С.Амарсайхан даргад ажил хийх хугацаа маш бага үлдсэн гэдгийг хэн хүнгүй мэднэ. Учир нь 2020 оны УИХ сонгууль болоход 1.2 жил хүрэхгүй хугацаа үлдсэн. Энэ ахархан богино хугацаанд одоо байгаа дарга нарыгаа хольж сольвол зөвхөн халаа сэлгээ хийсэн хотын дарга гэдэг гуншинг С.Амарсайхан дарга зүүх болно. Тиймээс халаа сэлгээнээс илүүтэй одоо байгаа дарга нартайгаа нэг баг болж 2020 онтой золговол маш олон ажлуудыг хамтдаа хийж намдаа төдийгүй нийслэлд ч нэр хүнд нь өснө гэдгийг хэлэх хэрэгтэй болов уу. Эцэст нь хэлэхэд Улаанбаатар хотын захирагч аа, ардаа хэл дагуулсан Г.Төмөрбаатарыг нэг орлогчоор томиловол таны нэр хүнд шавартай хутгалдана гэдгийг хэлэх нь зүйтэй биз ээ.