СӨҮЛ./Yonhap/.Кэсон хот дахь хоёр Солонгосын холбоо барих байрыг БНАСАУ дэлбэлсэн тухай өмнө нь мэдээлснийг БНСУ-ын Үндэстнээ нэгтгэх яам батлан мэдэгджээ.

"БНАСАУ орон нутгийн цагаар 14:49 цагт Кэсон хот дахь Солонгос хоорондын холбоо барих байгууламжийг дэлбэлсэн” хэмээн мэдэгдэлд дурджээ.

БНСУ-ын цэргүүд БНАСАУ-д чиглэсэн ажиглалтаа нэмэгдүүлж, өндөржүүлсэн бэлэн байдалд шилжсэн тухай "Yonhap” агентлаг мэдээлжээ.БНАСАУ-ын нутаг дэвсгэрт байдаг хилийн Кэсон хотод утаа гарч байгаа нь харагдаж, дэлбэрэлтийн чимээ сонсогдсон тухай агентлаг өмнө нь мэдээлсэн байна.

Хоёр Солонгосын хэлэлцээрт заасны дагуу цэргүүдээ татсан хэсгүүдэд цэргүүдээ буцааж байрлуулахаар төлөвлөж байгаа тухайгаа БНАСАУ мэдэгдээд буй үед энэ хэрэг болжээ. БНАСАУ-ын дээд удирдлагыг гутаан доромжилсон ухуулах хуудас тараасны хариуд тус улсын Зэвсэгт хүчин "өшөө авах ажиллагаанд” бэлтгэж байгааг Умард Солонгосын эрх баригчид БНСУ-д даваа гарагт анхааруулсан байна.

Энэ анхааруулгаас өмнө бямба гарагт БНАСАУ-ын удирдагч Ким Жөн Уны эмэгтэй дүү болох Солонгосын Хөдөлмөрийн намын Төв хорооны хэлтсийн орлогч дарга Ким Ё Жон Пёньян "дараачийн алхамаа” удахгүй хийхээр төлөвлөж байгаа тухай мэдэгдсэн байна. Тодруулбал, тэрбээр "Өмнөд Солонгосын талтай харилцаагаа таслах" хэрэгтэй гэж мэдэгдээд дараачийн үйл ажиллагааны талаарх шийдвэрийг "Солонгосын Ардын армийн Жанжин штабад хүлээлгэж өгнө" гэж цохон тэмдэглэжээ.

Пёньян ухуулах хуудас тараасныг хоёр талын найрамдлын хэлэлцээрийг зөрчсөн дайсагнасан үйлдэл хэмээн үзэж, энэ сарын 9-нөөс эхлэн БНСУ-тай харилцаа холбооны бүх шугамаа хаасан юм. Тухайлбал, харилцаа холбооны газарт байдаг бүх телефон утас тэр дундаа хоёр Солонгосын цэргийнхэн хоорондын харилцаа холбооны шугамыг, мөн Солонгосын Хөдөлмөрийн намын Төв хорооны байр, БНСУ-ын Ерөнхийлөгчийн ордонг холбосон шугамыг хаасан байна.