Ерөнхийлөгч асан Х.Баттулгыг хамаарал бүхий сүлжээгээрээ эрх мэдэл, холбоо сүлбээгээ ашиглаж их хэмжээний мөнгийг эргэлдүүлэн хууль бусаар хөрөнгөжсөн, гадаадын санхүүжилтийг татах нэрээр мөнгө угаасан байж болзошгүй. Энэ нь Монгол Улсын Үндэсний аюулгүй байдалд сөргөөр нөлөөлөх эрсдэл үүсгэж байна гэж үзэж нэр бүхий сэтгүүлчид Цагдаагийн ерөнхий газрын Мөрдөн байцаах албанд шалгуулах хүсэлтээ өглөө. Дээрх асуудалтай холбоотой 433 хуудас материалыг баримтаар хавсаргаж Цагдаагийн байгууллагат шалгуулахаар болжээ.

Х.Баттулгыг цагдаагийн байгууллагаар шалгуулахаар гаргаж буй үндэслэл нь:  

• Х.Баттулгын хамаарал бүхий 868.2 сая ам доллар, 52.9 тэрбум төгрөгийн үнэлгээ бүхий хөрөнгө нь "зүсээ хувиргасан хөрөнгө” буюу их хэмжээний угаасан, хууль бус үйлдэл байж болзошгүй гэж үзжээ. Мөн өмч хувьчлалыг өөрийн талд илт давуу байдлыг бий болгож ашигтай хэлбэрийг бий болгож том үйлдвэрүүдийг үнэгүйдүүлж хувьчилж аван хууль бусаар хөрөнгөжсөн байж болзошгүй.

Дээрхээс гадна Х.Баттулгын хамаарал бүхий ЖЭНКО ХОЛДИНГ группийн Олон улсад бүртгэлтэй үл хөдлөх хөрөнгүүдийг шалгаж дээрх компаниудыг ашиглаж өндөр албан тушаалын давуу байдлаа ашиглаж мөнгө угаасан байж болзошгүй. Билли Сим Пау болон Шаравын Наранцацралт нараар дамжуулан мөнгө угаасан гэмт хэрэг. Нийтдээ 25 сая ам доллар,1.4 тэрбум төгрөгийн орлогын гүйлгээгээр 2011 оноос хойш Монгол улсад амьдарч байгаа Сингапурын иргэн Билли Сим Пау гэгч нь Монгол Улсын Иргэн Ш.Наранцацралтын дансаар хийгдсэн их хэмжээний гүйлгээ нь мөнгө угаасан гэмт хэрэг мөн эсэхийг шалгуулах.

Х.Баттулгад хамаарах төлөгдөөгүй өрийн жагсаалт 27.6 тэрбум төгрөг, 326 сая ам долларыг шалгуулах. 2011 оны дөрөвдүгээр сараас 12-р сарын 6-ны хооронд Монголын төмөр зам ТӨХК-ийн данснаас гадаад шилжүүлгээр Халтмаагийн Баттулга, Цэндийн Энхтуяа, Баасадоржийн Батзаяа, Чулуунхүүгийн Ганбат, Болдбаатарын Мөнхзул нар БНХАУ-д төвтэй компанийн дансанд нийт нийлбэр дүнгээр 3.2 сая ам доллар, АНУ- д төвтэй компанийн дансанд 72 мянган ам доллар, мөн  АНУ-д төвтэй компанийн дансанд 548 мянган ам доллар буюу нийтдээ 3 сая 820 мянган ам долларын тус тус шилжүүлсэн байгаа нь мөнгө угаасан гэмт хэрэгт хамаарагдах эсэх. Х.Баттулгын нэгдмэл сонирхолтой компаниудын туслан гүйцэтгэгчээр орсон тендерийн төсөв 58 тэрбум 370 сая төгрөг байна. энэ нь өндөр албан тушаалаа ашиглаж хамаарал бүхий компани, хүмүүст боломж олгох төрийн хөрөнгийг үргүй зарцуулсан эсэхийг шалгуулах. Х.Баттулгын хүүхдүүд болох Баттулгын Хүлэгт, Баттулгын Номин, анхны эхнэр Уянгын хүү Эрдэнэбатын Есүнгэ нарын холбогдож, хууль хяналтын байгууллагад шалгагдаж байгаад сураг тасарсан Хар тамхи, мансууруулах бодистой хамаарал бүхий хэргүүдийг олон нийтэд ил болгож хуулийн дагуу арга хэмжээ авсан эсэхийг тогтоолгох. Магадгүй эдгээр хэргийг шалган тогтоож холбогдох хуулийн дагуу арга хэмжээ авсан бол уг хэргийн талаарх мэдээллийг олон нийтэд ил болгох хүсэлтийг холбогдох байгууллагуудад гаргаж байгаа аж.