Ахмадын сургууль
Энэтхэгт өндөр настнуудад зориулсан ерөнхий боловсролын сургууль нээгджээ. Энэ сургууль нь урьд нь боловсрол эзэмших боломжгүй байсан 60-аас дээш насны иргэдэд уншиж бичихийг заах юм. Учир нь Энэтхэг улсад эмэгтэйчүүдийн 35 хувь нь бичиг үсэг тайлагдаагүй байдаг аж.
Энэтхэгийн Фаньгань тосгонд "Aajibaichi Shaala” хэмээх сургуульд 60-аас дээш насны иргэд уншиж, бичихэд суралцаж байна. Энэ иргэд хүүхэд байхдаа боловсрол эзэмших боломжгүй байсан бөгөөд дийлэнх нь өөрийн нэрээ ч бичиж чаддаггүй аж.
60 наснаас дээш хүмүүст уншиж бичихийг заах санаачлагыг орон нутгийн бага сургуулийн багш нар гаргажээ. "Хичээл зааж байх үеэр хүүхдүүд рүү орилох, тэднийг загнаж болно. Харин эмээ нартай тэгж харилцаж болохгүй. Тэдэнтэй ажиллаж байхдаа чин сэтгэлээсээ хандаж, маш их тэвчих шаардлагатай байдаг. Учир нь зарим нэг нь сонсгол муу, бусад нь хараа муу гэх мэт зовлон байдаг. Иймээс хичэлээ хэд хэдэн удаа чанга дуугаар тайлбарлаж өгөх хэрэгтэй байдаг” – хэмээн 30 настай багш Шитар Пракаш Морэ өгүүлжээ.
"Aajibaichi Shaala” сургуулийн сурах бичгийг сурагчид өөрсдөө бэлддэг юм байна.
Эмэгтэйчүүд үдээс өмнө ар гэрийн асуудлаа зохицуулж, үдээс хойш хичээлдээ явдаг аж.
"Aajibaichi Shaala” сургуулийн нэгэн сурагч хичээл эхлэхээс өмнө гэртээ хоол хийхийн тулд гал асааж буй байдал.
Харин энэ зураг бол хичээл эхлэхээс өмнө ач хүүгээ унтуулж буй байдал.
"Aajibaichi Shaala” сургуулийн хичээл долоо хоногт зургаан удаа хоёр цагаар ордог юм байна. "Миний өвдөг өвддөг. Надад удаан суух маш хэцүү байдаг ч би хичээлдээ явдаг” хэмээн сурагчдын төлөөлөл хэлж байна.
70 настай Друпада Пандурангкедар өндөр настнуудын сургуульд сурдаг. Харин түүний ач охин улсын бага сургууль сурдаг аж.
Энгийн сургуулиудын адил "Aajibaichi Shaala” сургуульд ч гэсэн өөрийн гэсэн дүрэм байдаг. Тухайлбал сурагчид бүгд ягаан сари дээр суудаг байна.
Энэтхэг улсад бичиг үсэг тайлагдаагүй иргэдийн асуудал хурцаар хөндөгддөг. ЮНЕСКО-гийн гаргасан судалгаагаар тус улсад ойролцоогоор 287 сая хүн уншиж, бичиж чаддаггүй юм байна. Энэ нь нийт хүн амын дөрөвний нэг нь гэсэн үг юм.
ЮНЕСКО-гаас гаргасан "Бүх нийтийн боловсрол” илтгэлд Энэтхэгт дэлхийн нийт бичиг үсэг тайлагдаагүй иргэдийн 37 хувь нь амьдардаг гэж судлаачид хэлжээ.
Энэтхэгийн эмэгтэйчүүдийн 35 хувь нь, харин эрчүүдийн 18 хувь нь бичиг үсэг тайлагдаагүй байдаг.
Учир нь энэ улсад охид 12 настайдаа нөхөрт гардаг уламжлалтай тул эрчүүд эмэгтэйчүүдийн боловсролын түвшин эрс ялгаатай байдаг юм байна.
Энэтхэг улс 20 жилийн өмнө боловсролд төсвийн 13 хувийг зарцуулдаг байсан бол одоо ойролцоогоор 10 хувийг боловсролд зарцуулдаг юм байна.
"Хүүхэд байхдаа би сургуульд явж чадаагүй. Улмаар би бүхэл амьдралынхаа туршид бичиг үсэг тайлагдаагүй. Гэхдээ би ийм байдлаараа өөд болмооргүй байна. Диваажинд очихдоо өөрийн нэрээ бичиж чаддаг болсон байна гээд бодохоор би үнэхээр аз жаргалтай байна” хэмээн "Aajibaichi Shaala” сургуулийн сурагчдын төлөөлөл ярьжээ.
БЭЛТГЭСЭН: Э.УРАНЦЭЦЭГ
ЭХ СУРВАЛЖ: КОММЕРСАНТ
Сэтгэгдэл байхгүй байна.