Эзэнтэй онигоо
1980-аад оны дундуур боксын дасгалжуулагч В.Батбаяр хожим Олон улсын хэмжээний мастер болсон А...г залуу хүн жаахан туршлага суугаад аваг гээд анх удаа Москвад болсон олон улсын тэмцээнд авч явжээ. Тэмцээн ч эхэлж. "Багш аа, би хэнтэй таарав” хэмээн асууж байна гэнэ. Багш нь, "Өө мэдэхгүй. Ёстой дуулаагүй нэр байна. Тосгоны нөхөр байх. Нам цохиод унагаахгүй юу” гэж. Нөгөөх нь "За” л гэж байна гэнэ.
Ингээд эхний раунд яралзтал нүдэлдээд амьсгаадсан нөхөр амрахаар ирж дээ. Яав гэтэл, арай амжсангүй, одоо ална аа л гэж. Хоёрдугаар раундад бас л ана мана үзэлцээд бууж ирж. Барахгүй байна уу гэхэд, арай л барсангүй, одоо нам цохино оо л гэж байна гэнэ. Гуравдугаар раунд дуусахад манай нөхөр ганц онооны зөрүүгээр ялагджээ.
В.Батбаяр гуай түүнийг их л уравгар янзтай ирэхээр нь үнэнийг хэлж, наадах чинь нөгөө дэлхийн аварга, Европын гурван удаагийн аварга, Олимпийн хүрэл медальт тэр шүү дээ гэхэд мань эр цурхиртал уйлан, "Та надад хэлэхгүй яасан юм бэ, алуулах шахсан байна шүү дээ” хэмээсэн гэдэг юм.
Сэтгэгдэл байхгүй байна.