Монгол орны эдийн засаг хүнд хэцүү байна гэж дээр дооргүй ярьж байгаа. Тийм ч учраас УИХ, байнгын хороогоор цалинг танах тухай хүчтэй яригдаж байна. Харин энэ асуудал дээр УИХ-ын гишүүн Ц.Нямдорж өөрийн байр сууриа илэрхийлжээ.

 Тэрээр "Ирэх 2016 оны төсөв дээр 100 тэрбум төгрөгийн шинэ хөрөнгө оруулалт тусгахын оронд цалинг хэвээр нь үлдээ. Эсвэл үр ашиггүй орон тоогоо танах хэрэгтэй. Хотын Засаг дарга Э.Бат-Үүл хоёр орлогчтой байна гэсэн. Гэтэл өнөөдрийн хүртэл зургаан орлогчтой ажиллаж байна. Мөн цэц 16 хүнтэй ажиллаад болоод байдаг байсан одоо 45 ажилтантай болсон. Эдгээр цомхотголоос эхэлж хийгээд цалинд гар дүрэхгүй байх боломжтой” гэсэн юм.

 Харин НЗДТГ-ын дарга Ё.Гэрэлчулуун энэ асуудалд арай өөр байр сууринаас хандаж байгаа. Тэрээр "Манайхан юмыг өнгөц хэлбэрийг харах дуртай. Улаанбаатар хот өөрийн гэсэн дүрэмтэй, өөрөө эдийн засгаа аваад явчихдаг чадалтай байхад Засгийн газар, УИХ-аас Улаанбаатар хоттой зууралдах ямар ч шаардлагагүй шүү дээ. Өөрсдийн ажлаа хийх хэрэгтэй. Нийслэл хэдэн орлогчтой байх нь үнэндээ эрхзүйн хувьд  тэдэнд ямар ч хамааралгүй” гэж мэдэгдээд буй юм.

 Дашрамд, нэг тоо бодъё,

Засаг даргын нэг орлогчийн сарын цалин нэг сая төгрөг. Зургаан орлогчоор тооцвол жилийн цалин 70 орчим сая төгрөг. Туслах, нарийн бичгийн цалин, зардлын хамт нийлээд 300 гаруй сая төгрөг болж байна. Зөвхөн Нийслэлийн Засаг дарга Э.Бат-Үүлийн дөрвөн орлогчийг цомхотгосноор 300 гаруй сая төгрөг хэмнэх юм. Үүн дээр аймаг, дүүргийн орлогч нарыг оролцуулбал нилээд тоо гарна.