АНУ-ын Тэнгисийн цэргийн "USS Nimitz" тээгч хөлгийн хоёр хөлөг онгоц Ням гаригт /2025.10.26/ Өмнөд Хятадын тэнгист тус тусдаа үүрэг гүйцэтгэж яваад, осолджээ. Эдгээр нь "Sea Hawk" нисдэг тэрэг болон "F/A-18 Super Hornet" сөнөөгч онгоц байсан.

АНУ-ын Тэнгисийн цэргийн хамгийн том флот болох Номхон далайн флотын мэдээлснээр, Ням гаригт орон нутгийн цагаар 14:54 цагт "MH-60R Sea Hawk" нисдэг тэрэг "USS Nimitz" тээгч хөлгөөс ердийн ажиллагаа явуулж байхдаа осолдсон байна. "USS Nimitz"-ийн дэргэдэх эрэн хайх, аврах баг тэр даруй ажиллагаа явуулж, хөлгийн багийн гурван гишүүнийг уснаас аварчээ.

Эхний ослоос ойролцоогоор 30 минутын дараа "F/A-18 Super Hornet" сөнөөгч онгоц мөн "USS Nimitz" тээгчээс хөөрснийхөө дараа Өмнөд Хятадын тэнгист унасан байна. Аврах багийнхан дахин түргэн шуурхай ажиллаж, хөлгийн багийн хоёр гишүүнийг аварчээ.

Тэнгисийн цэргийнхэн ослыг нарийвчлан шалгаж байгаа бөгөөд тухайн үеийн цаг агаар, техникийн асуудал байсан эсэх, ослын үед чухам ямар даалгавар гүйцэтгэж байсан зэрэг мэдээллийг хараахан дэлгээгүй байна.

"USS Nimitz" нь АНУ-ын Тэнгисийн цэргийн хамгийн хуучин бөгөөд идэвхтэй ажиллаж байгаа тээгч хөлөг. Тус тээгч хөлөг нь АНУ, Хятадын хурцадмал байдал улам бүр нэмэгдэж буй Өмнөд Хятадын тэнгист тогтмол үйл ажиллагаа явуулдаг.