Дэлхийн загварын ертөнцийн алдарт "Next Top Model”  шоу нэвтрүүлгийг "Боловсрол” телевиз 10 жилийн ойдоо зориулан "Бюро 24/7” дижитал сэтгүүлтэй хамтран  албан ёсны эрхтэйгээр монголчуудын хүртээл болгон өчигдөр амжилттай өндөрлүүллээ. Өнгөрсөн хоёр сарын турш үзэгчдийг цэнхэр дэлгэцийн өмнө уян сэтгэлийг нь хөдөлгөж, талцуулж, сошиалд ярианы гол сэдэв болсон "Mongolia's Next Top Model” ийнхүү монголын дараагийн топ моделийг зарласан юм.

Ялагч Б.Цэрэндолгортой шагналаа гардан авсан тэр л торгон агшинд цөөн хором ярилцлаа.

-Шилдгийн шилдэг болж, монголын дараачийн топ моделиор шалгарсанд баяр хүргэе.

-Яг энэ мөчид сэтгэгдэл дэндүү өндөр байна. Би анхнаасаа ямар том мөрөөдөл, зорилго тээн энэ шоунд орж ирсэн билээ. Үүнийхээ ард гарсандаа үгээр хэлшгүй их баяртай байна.

-Сингапурын "Looque” агентлагтай хоёр жил хамтран ажиллах эрхийн эзэн болсон шүү дээ. Тэнд өөрийнхөө ямар давуу талыг илүү гарган ажиллах вэ?

-Би Монгол хүн гэдэг бол миний давуу тал. Үүнийг л илүүтэй гаргаж ажиллахыг хүсэж байна.

-Тэмцээний финалын шалгаруулалтын санал асуулгаар Ю.Балжидмаа хамгийн их санал авсан. Магадгүй тэмцээний дараа иргэд сошиалаар үзэл бодлоо илэрхийлэх байх. Тэр бүх хүмүүст хандаж юу гэж хэлмээр байна?

-Би өмнө нь яриандаа хэлж байсан. Монгол бол миссийн ертөнц. Тэр ч утгаараа моделийг ойлгох арай болоогүй байгаа. Хэрвээ ойлгодог газар байсан бол ямар ч асуудал гарахгүй байсан. Өөрийнхөө үзэл бодлыг илэрхийлэх нь тэр хүмүүсийн эрх. Би үүнд тайлбар тавих шаардлагагүй байх гэж бодож байна.

-Өөрийн тань бодлоор модель хүн гэж хэн бэ?

-Модель хүн гэж хэн нэгний нүдэнд тусах өвөрмөц царайтай, миссээс ялгагдах гол онцлог нь ажил хийж байгаа хүн. Мисс бол энхийн элч байдаг бол модель гэдэг бол мэргэжил. Үүгээрээ хамгийн том ялгаатай. Модель бол хүнд онцгой мэдрэмж төрүүлж чаддаг, хүний хийсэн бүтээснийг хүнд хүргэж чаддаг хүнийг л хэлэх байх.

-Өөрийн тань хувьд цаашид өмнөө тавьж буй том зорилго тань юу вэ?

-Би ямар нэгэн зүйлд хайрцаглагдахыг хүсэхгүй байна. Тийм учраас миний туйлын зорилго бол тэр гээд түүндээ хүрээд зогсохыг хүсэхгүй байна. Ямар нэг хязгааргүйгээр, дэлхийд гарч монголд моделиуд ямар мундаг вэ гэдгийг үзүүлэхийг хамгийн их хүсэж байна.

-Хамгийн хүнд, хэцүү байсан сорил гэвэл алийг нь нэрлэх вэ?

-Сорилуудаас хамгийн хэцүү нь ээжтэйгээ оролцсон тэр зураг авалт байсан. Ээжийгээ хараад сандраад, маш их баярлаад бүх сэтгэл хөдлөл давхацсан тийм үе байсан. Түүнийг яаж давснаа одоо ч санахгүй байна. Гэхдээ бас маш их жаргалтай үе байсан.

-Үндсэн даалгавруудаас?

-Манай оролцогч охин бүр хэлэх байх. Хөвсгөл далай дээр авахуулсан зураг авалт хамгийн хэцүү байсан. Мэдээж бид 40 хэмийн хүйтэнд нимгэн хувцастай зураг авалтад оролцсон. Магадгүй телевизээр хоёр гурван минут гарч байгаа ч яг бодит байдал дээрээ нэг оролцогч 20-30 минут тэр хүйтэнд гадаа зогсож зургаа авахуулдаг юм шүү гэдгийг одоо магадгүй хүмүүс ойлгодог болсон байх.

-Энэ шоунд оролцсоноор Цэрэндолгорын хувьд хэр их өөрчлөгдсөн бэ?

-Яг хувь хүнийхээ хувьд зорьж байсан зүйл бол би өөрийгөө олох байсан. Миний боддог Цэрэндолгор гэдэг хүн би өөрөө мөн байсан уу гэдгийг олохыг хүссэн. Яг мөн байсан. Нэг их зөрөөгүй.  Мөн хувь хүн талаасаа хүнтэй харилцах гээд маш олон зүйлийг эндээс сурсан.

-Тэмцээний зохион байгуулалтын талаар ямар сэтгэгдэлтэй байна?

-Монголд байгаагүй тийм л сайн зохион байгуулалттай нэвтрүүлэг гэж хэлнэ. Яагаад гэвэл өмнө нь бид олон нэвтрүүлэг үзэж байхад алдаа оноо харагддаг шүү дээ. Энэ нэвтрүүлэгт ямар ч тийм алдаа байгаагүй. Бодит байдал, зохион байгуулалт дээрээ ч шүүгчид, бидэнд ирж байгаа сорил гээд бүх зүйл төгс байсан гэж хэлж болно. Энэ шоу модель гэдэг хүн ямар хүн байдаг юу хийдгийг монголчуудад таниулах зорилготой байсан учраас үүнийгээ 100 хувь биелүүлсэн гэж би үзэж байгаа.

-Шоу, нэвтрүүлгийн явцад өөрийг тань хамгийн их гайхшруулсан зочин шүүгч гэвэл хэнийг нэрлэх вэ?

-Намайг гайхшруулсан зочин шүүгч гэвэл би багшийгаа нэрлэнэ. Миний багш топ модель Д.Болормаа сүүлийн шатны шалгаруулалт дээр бидэн дээр ирж шүүсэн байгаа. Хүн чинь багшийгаа хараад баярлаад тайвширдаг басхүү сандардаг. Яг тийм л мэдрэмжүүд төрөн багшийгаа харан сандраад уйлах гээд баярласан. Тэр шүүлт дээр багштайгаа хамгийн гоё байсан.