Нийтийн тээврийн цахим төлбөрийн системийн нээлт энэ сарын 24-нд болно. Гэтэл иргэд цахим картыг хаанаас, хэрхэн  худалдан авч цэнэглэх тал дээр мэдлэг, мэдээлэл багатай байна.

Одоогоор том оврын 1100 автобусанд цахим системийн тоног төхөөрөмжийг суурилуулжээ. Энэхүү төхөөрөмжинд уншуулах цахим картыг иргэд автобусны буудлын ойролцоо байрлах карт борлуулах төвөөс авах боломжтой юм. Энэ хүрээнд нийслэлийн автобусны буудлуудад нийт 280 цэг байгуулах аж. Иргэд цахим карт борлуулах цэгийг "U Money” гэсэн логогоор таних боломжтой гэнэ.

Ахмад настан, хөгжлийн бэрхшээлтэй иргэдийн цахим картыг  амьдарч байгаа хорооныхон нийгмийн халамжийн ажилтан, дүүргийнхэн  нийгмийн халамжийн хэлтсээр нь дамжуулан олгож эхэлсэн байна. Харин оюутнууд өөрийн сурч буй сургуулиасаа нийтийн тээврээр зорчих цахим картаа авах боломжтой юм. Оюутны картыг хараахан олгож эхлээгүй байгаа аж.