Насаараа дэмжсэн, хайртай багийнхаа тоглолтыг нутагт нь, гэр болсон цэнгэлдэх дотор нь өөртэйгөө адил мянга мянган фанатуудын дунд орж үзнэ гэдэг юутай жаргал вэ? Тэгвэл Б.Очирваань гэх Английн Манчестер Юнайтедын фанат залуу Улаанбаатараас Манчестер хот хүртэл 14000 км замыг унадаг дугуйгаар туулж, хайртай багийнхаа тоглолтыг үзэхээр шийджээ.

Түүний хувьд одоогоор Лондон хотод байгаа бөгөөд өчигдөр/2024.04.21/ ФА цомын хагас шигшээ шатанд учраа таарсан Манчестер Юнайтед болон Ковентри Сити багуудын тоглотыг үзсэн аж. Тус тоглолтод Манчестер Юнайтед баг тун хүнд байдлаас торгуулийн цохилтоор өрсөлдөгчөө буулган авч, финалд шалгарсан юм.

Хайртай багийнхаа тоглолтыг үзсэн Б.Очирвааний зорилго үүгээр дуусаагүй. Тэрбээр "Мөрөөдлийн театр" нэрээрээ алдартай багийнхаа Олд Траффорд цэнгэлдэхэд Манчестер Юнайтедынхаа тоглолтыг үзэж, мөрөөдлөө биелүүлэхийг хүсч байна.

Б.Очирвааний талаар Англи төдийгүй Европын хэвлэлүүд, шар мэдээний хуудсууд мэдээллэж, подкаст, нэвтрүүлэгт хүртэл уригдаад амжжээ. Тэрбээр энэ талаараа "Хайртай багаасаа болон хөлбөмбөгөөс байж болох хамгийн гайхалтай мэдрэмжүүдийг бүгдийг нь нэг тоглолтоос авах үгээр хэлэхийн аргагүй гайхалтай байна" хэмээгээд "Тун удахгүй бидний жинхэнэ гэрт бахархал дүүрэн уулзъя хайрт, Манчестер Юнайтед минь" гэжээ.