Т.Билэгт: Тэр үеийн шийдвэр гаргагчдыг бүгдийг яллавал шударга ёсонд нийцнэ
НИТХ-ын
дарга асан Т.Билэгт, УИХ-ын гишүүн асан Ц.Батбаяр нарт холбогдох шүүх
хурал өчигдөр өглөө Дүүргийн Эрүүгийн хэргийн нэгдүгээр шүүхэд эхэлж
орой 21:00 цагийн үед шүүх бүрэлдэхүүн шийдвэрээ сонсгосноор өндөрлөв.
Т.Билэгт болон н.Маналжав, н.Чанцал нарыг шүүхээс гэм буруутайд тооцсон хэдий ч үйлдсэн хэргийн харгалзах хугацаагаар нь 2009 оны Өршөөлийн хуульд хамруулан хэргийг хэрэгсэхгүй болгосон юм. Харин нийслэлийн Засаг дарга, УИХ-ын гишүүн асан Ц.Батбаярыг мөн хэрэгт гэм буруутайд тооцож 2.1 жилийн ялыг чанга дэглэмтэй хорих ангид эдлүүлэхээр болж, шүүхийн танхимаас ШШГЕГ-ын харьяа Цагдан хорих 461 анги руу авч явсан юм. Төрийн албан тушаалтан албаны эрх мэдэл буюу албан тушаалын байдлаа урвуулсан бол дээд тал нь 10 жилийн хорих ялаар шийтгүүлэх заалттай билээ.
Т.Билэгт, Ц.Батбаяр нар нь Нийслэлийн Засаг дарга болон Өмч хувьчлалын комиссын даргын ажлыг давхар хашиж байхдаа албан тушаалын байдлаа урвуулан ашиглаж 605 сая төгрөгийн үнэлгээтэй "Өргөө” зочид буудалыг татан буулгаж, Н.Энхбаярын хүү Э.Батшугарын нэр дээр байгуулсан "Хар дун” компанийн өмчлөлд шилжүүлсэн. Улмаар уг компанийг Н.Энхбаярын үүсгэн байгуулсан "Эскон” компанийн охин компани болгон шилжүүлэн үрэгдүүлж, Нийслэлийн өмчид онц их хэмжээний хохирол учруулсан гэмт хэргийг гардан үйлдсэн хэрэгт буруутгагдсан.
Мөн Т.Билэгтийг албан тушаалын байдлаа урвуулан ашиглаж хоёр тэрбум 125 сая төгрөгийн үнэлгээтэй "Улаанбаатар таймс” сониныг хууль бусаар Н.Энхбаярын төрсөн дүү Н.Энхтуяагийн "Медиа холдинг” компани, Д.Чулуунбаатар нарын нэрээр хувьчилж, улмаар Н.Энхбаярын үүсгэн байгуулсан "Эскон” компанийн охин компани болгон шилжүүлэн, үрэгдүүлж Нийслэлийн өмчид онц их хэмжээний хохирол учруулсан гэмт хэргийг гардан үйлдсэн хэрэгт буруутган шүүсэн билээ.
Өчигдөр болсон шүүх хурлын үеэр НИТХ-ын дарга асан Т.Билэгт, УИХ-ын гишүүн асан Ц.Батбаяр нар юу гэж мэдүүлж, ямар тайлбар хэлж байсныг хэсэгчлэн хүргэе.
Т.БИЛЭГТ: ТЭР ҮЕИЙН ШИЙДВЭР ГАРГАГЧДЫГ БҮГДИЙГ ЯЛЛАВАЛ ШУДАРГА ЁСОНД НИЙЦНЭ
"Нийслэл, ер нь Монгол Улсад явагдаж ирсэн өмч хувьчлалд хэзээ ч газрын үнэлж, худалдаж байсан түүх байхгүй. Монгол Улсын үндсэн хуулийн 6.2-т Монгол Улсын иргэдэд өмчлүүлснээс бусад газар, түүнчлэн газрын хэвлий, түүний баялаг, ой, усны нөөц, ан амьтан төрийн өмч мөн” гэж заасан байдаг. Гэтэл төрийн өмч байх ёстой газрыг бусдад үнэлж худалдсан, хувьчилсан гэж намайг яллаж байгааг ямар учиртайг улсыг яллагчаас асуумаар байна. Ингэж яллаж байгаа нь хуульд нийцэж байна гэж үзэж байгаа бол 1990 оноос хойш явагдсан бүх өмч хувьчлал, хувьчлагдсан обьектын байрлаж байгаа газрыг үнэлж, тэр үеийн шийдвэр гаргагчид, хувьчилж авсан бүх хүмүүсийг яллавал шударга ёсонд нийцнэ гэж үзэж байна.”
Т.БИЛЭГТ: НАДТАЙ ХОЛБООТОЙ ЯМАР Ч МАТЕРИАЛ, МИНИЙ НЭР Ч БАЙХГҮЙ
"Улаанбаатар таймс нийслэлийн өмчит үйлдвэрийн газрыг Д.Чулуунбаатар ахлагчтай менежментийн баг хувьчилсан. Менежментийн баг ямар бүрлэдэхүүнтэй, яаж ажиллаж байсныг нотлох баримт хангалттай байгаа. Менежментийн багийн гишүүдийн мэдүүлгэнд надтай холбоотой ямар ч материал, миний нэр ч байхгүй. Хувьчлалын багт нь менежментийн багийн гишүүдээс гадна тухайн сонингийн хамт олон, сэтгүүлчид байсан. Нийслэлийн өмчит үйлдвэрийн газрын 77-р тогтоолд худалдах, худалдан авах гэрээтэй бүхий л баримт бичигт Н.Энхтуяа гэсэн нэр байхгүй. Ийм байхад Н.Энхтуяагийн "Медиа холдинг” компанийн нэр дээр шилжүүлж хувьчлал хийсэн гэж яллах дүгнэлтэд бичсэн байна. Миний бие энэхүү хувьчлалд албан үүргийн дагуу оролцож 75-р тогтоолд гарын үсэг зурснаас хойш Улаанбаатар таймс сонины хувьчлалтай холбоотой ямар ч үйл ажиллагаанд оролцоогүй. Тийм эрх, үүрэг ч байхгүй. Тогтоол гарсан. Улмаар холбогдох дүрэм журам, гэрээнийхээ дагуу төлбөр мөнгө нь хийгдээд явсан. Зээл авсан, төлбөр хийсэн, хууль зөрчсөн бол гэрээ хийсэн хүмүүсийн хариуцлагын асуудал. Гэтэл надтай яаж холбогдож байгааг ойлгохгүй байгаа.”
Т.БИЛЭГТ: ЦАГААТГАЖ ӨГӨХИЙГ ХИЧЭЭНГҮЙЛЭН ХҮСЬЕ
"Гурван шатны шүүхийн шийдвэрийг би бүхэлд нь буруутгах гээгүй, тийм зорилго ч агуулаагүй. Зөвхөн Н.Энхбаяр нартай бүлэглэн гэж миний нэрийг дурдсан асуудалд тайлбар хийхийг хүсч байна. Яллах дүгнэлтэд байгаа нотлох баримтыг хуулийн заалт, шударга үнэнд тулгуурласан эсэхэд шүүх бүрэлдэхүүн анхаарч, надад холбогдуулж байгаа энэхүү хэргийг хэрэгсэхгүй болгож, цагаатгаж өгөхийг хичээнгүйлэн хүсье.”
Ц.БАТБАЯР: "ӨРГӨӨ” ЗОЧИД БУУДЛЫН ҮЙЛ АЖИЛЛАГАА ДОГОЛДСОН БАЙСАН
Нийслэлийн засаг дарга бүх асуудлыг шийддэг хүн биш. Мэргэжлийн байгууллага, Өмчийн харилцааны газраар дамжиж байж аливаа асуудал шийдэгддэг. Нэгдүгээрт "Өргөө” зочид буудлын үйл ажилллагаа доголдсон байсан. Үндсэндээ сүүлийн хэдэн жил алдагдалтай ажилласан. Хоёрдугаарт нь байгууллагыг удирдаж байгаа хүмүүсийн арга барил хуучинсаг болсон. Гуравдугаарт үйлчилгээний цар хүрээ байхгүй, дөрөвдүгээрт өрсөлдөх чадваргүй болсон. Тавдугаарт Нийгмийн даатгал болон татварт их хэмжээний өр хуримтлагдсан байсан.Ийнхүү ашигт ажиллагаа байхгүй болж, дампуурахад бэлэн болсон байсан юм. Энэ нь нийслэлийн өмчийн хамтарсан компани болгох үндсэн шалтгаан болсон. Тэр үед хажууд нь байсан хувийн зочид буудал хэдэн сая төгрөгийн ашигтай ажиллаж байхад нэгдүгээр зэрэглэлийн байрлалтай нийслэлийн өмчийн "Өргөө” зочид буудал алдагдалтай ажиллаж байсан нь үнэн.
Ц.БАТБАЯР: ХАМТАРСАН КОМПАНИ БАЙГУУЛСНААР СӨРӨГ ТАЛ ГАРААГҮЙ
Хамтарсан компани байгуулснаар сөрөг тал гэж гараагүй. Харин ч эерэг тал олон болсон. Гадна барилгын өнгө үзэмж сайжирч хотын төвд өнгө үзэмж нэмсэн. Мөн хяналтын ажиллагааг дээд зэргээр хийсний ачаар өнөөдөр Монгол улсын топ дөрвөн одтой зочид буудлуудын нэг болсон. Менежмент нь сайжирсан юм. Хуучин алдагдалтай ажиллаж байсан бол 2011 оноос 138 сая төгрөгний ашигтай ажилласан. Мөн тав тухтай орчныг бүрдүүлж, үйлчлүүлэгчдийн тоо болон ажлын байр нэмэгдсэн.
Б.БУРМАА
mongolcomments