Өндөр гэгээн Занабазарын мэндэлсний 390 жилийн ойд зориулсан "Өндөр гэгээний бүтээл шаазан урлалд” үзэсгэлэн нээлтээ хийх гэж байна. Шаазан урлаач, чимэглэлийн зураач, дүрслэх урлаг судлалын магистр Х.Хадхүү нь оюутан наснаасаа эхлэн 40 орчим жилийн турш Өндөр гэгээн Занабазарын уран бүтээлийг гүнзгий судалж, өөрийн бүтээлийн гол сэдвийн нэг болгон хөгжүүлжээ. Тэрбээр Хорин нэгэн дарь эх болон Өндөр гэгээний бусад гайхамшигт бүтээлүүдийг шаазан, керамикаар урлахаас гадна монгол ахуй, ёс заншил, түүхэн нэрт хүмүүсийн дүр төрхийг шаазан урлалын төрлөөр бүтээж ирсэн байна. Олон давхар задаргаат хэв авах, төрөл бүрийн материалаар цутгах, паалан будах, өндөр температураар давтан шатаах зэрэг нарийн технологийн шат бүрийг судлан, туршиж, залгаасгүй цутгах өвөрмөц арга барилаар уран бүтээлээ туурвидаг нь түүнийг Монголын шаазан урлалын онцгой төлөөлөгчдийн нэг болгожээ. Ийнхүү Х.Хадхүү Монголын төдийгүй дэлхийн урлагийн түүхэнд шинэ хуудас нээсэн Өндөр гэгээн Занабазарын мутрын бүтээлүүдийг орчин цагийн шаазан урлалаар дахин амилуулж, "Их Монгол төсөл”-тэй хамтран уламжлалт дэг сургуулийн үнэ цэн, гоо зүй, соёлын өвийг түгээн дэлгэрүүлж байна. Үзэсгэлэнг Өндөр гэгээн Занабазарын мэндэлсэн өдөр болох намрын адаг сарын 25 буюу 2025 оны 11 дүгээр сарын 14-ний өдөр нээж энэ сарын 21-ний өдрийг хүртэл Богд хааны ордон музейд үргэлжлүүлэн гаргана.