Ингээд харахаар Э.Намуун найруулагчаас оноосон дүрийг тун чадварлаг, часхийтэл бүтээчихдэг жүжигчин юм. Туслах дүр атлаа гол дүр мэт тодоор үзэгчдийн сэтгэлд бууна. Үзсэн хүмүүс санаж байгаа бол "Хамтдаа” гэх найз, нөхөрлөлийн үнэ цэн, мөн чанарыг харуулсан нэгэн бүтээлд тэр хөрөнгө мөнгөтэй айлын дураараа охин, нөхрөө "хуурч”, бүгдийг мөнгөөр, хүчээр шийдэх гэж оролдож байсан эмэгтэйн дүр бүтээж байсныг санаж байгаа байх. Дараа нь "Үлгэрийн баатар гэртээ харих замд”, "Life is love" зэрэг кинонд тоглосон. Ихэнхдээ ааль маяг, сэргэлэн, авхаалжтай, үзэсгэлэнтэй дүрүүд түүнийх байдаг. Үүнийг бид хошин урлагийн тайзан дээрээс ч олон номерын дүрээс харсан билээ.

"Мөрөөдлийн театр” хэмээх их айлын нэгэн чимэг болж, авьяас билиг, хөдөлмөрөө зориулж байгаад ээжийн үүргээ гүйцэтгэхээр уран бүтээлээсээ түр чөлөө авч, эргэн ажилдаа орсон тэр харин хоёр ч сонирхолтой дүрээр үзэгчидтэй уулзсан нь эхэнд хэлсэн хоёр уран бүтээл. 

    Зохиолч Ш.Гүрбазар гуайн зохиолоор бүтсэн "Галбингаа” кинонд жүжигчин Г.Эрхэмбаяр дүр бүтээхээс гадна продюсераар нь ажилласан. Тиймдээ ч эхнэртээ зориулсан, "Амьдрал минь, гэр бүл минь өнөөд яг галбингаа шувуу шиг байгаа учир энэ сайхан эрүүл энх, элэг бүтэн амьдралаа бэлгэдэж энэ бүтээлээ хийсэн” гэж ярьсан. Харин Э.Намууны бүтээсэн Энх-Үүлэн бол эхнээсээ эцсээ хүртэл хэлсэн амласандаа хүрч чадсан дүр. Эх хүн болохын хүслэнгээрээ сайн ээж болсон.

Эх, үрийн нандин холбоог тэд энэ бүтээлээрээ онцлогтой, онцгой харуулсан. 

 

    Тэрбээр арван жилээ Нийслэлийн нэгдүгээр сургуулийг төгсжээ. Сургуульд байхаасаа л урлагийн үзлэгт маш дуртай хүүхэд байсан гэнэ. Ахлах ангид орохдоо харин жүжигчин болох шийдвэрээ гаргасан байна. Энэ тухай "Ингэж яваад элсэлтийн шалгалтдаа бэлдэж, СУИС-ийн шалгалтад тэнцсэн. Тухайн үед СУИС ур чадварын шалгалт авдаг байсан юм. Би эхний шатандаа нэгдүгээрт жагсаж, хоёрдугаар шатандаа тэнцсэнээр урлаг гэх айлын хаалгаар орох боломж олдож байсан” гэж ярьсан байдаг. Оюутан байхдаа тэр мөн "To be or not to be” шоунд оролцсон. Тэгж байхдаа "Мөрөөдлийн театр”-ыг сонирхож, дараа нь орсон гэдэг. Тэр ингэж л арван жилээсээ мэргэжлээ сонгож, түүнийхээ төлөө тууштай явж, өнөөдрийг хүртэл чадварлагаар дүрээ бүтээсээр байна.