Ирэх хоёр жилийн хугацаанд Пентагон 40 мянган цэрэг, офицеруудыг цомхотгохоор төлөвлөж байгаа талаар Америкийн хэвлэлүүд мэдээллээ.

Батлан хамгаалах салбарын зардал бууруулах тус төлөвлөгөөний хүрээнд АНУ-ын арми мөн 17 мянган жирийн албан хаагчаа халах юм байна.

Уг төлөвлөгөөг хэрэгжүүлснээр 2017 оны эцэс гэхэд АНУ-ын цэргүүдийн тоо 450 мянга орчим болж багасна.

2012 онд Ирак, Афганистаны зэвсэгт мөргөлдөөн хурцдаж байх үед АНУ-ын арми 570 мянга орчим цэрэгтэй байжээ.

Харин одоогийн байдлаар 10 мянга орчим Америк цэрэг Афганистанд байрласан хэвээр.

Түүнчлэн "Исламын улс” алан хядах бүлэглэлтэй тэмцэхийн тулд Иракийн армид туслах зорилгоор 3500 АНУ-ын цэргийн шинжээчдийг байрлуулсан юм.

Эх сурвалж: ВВС