Нурж унаад ногоон ургамлаар хучигдсан байшин барилга бүхий анир чимээгүй ертөнцийг төсөөлөөд үз л дээ...

Яг үнэндээ тэнгэр баганадсан өндөр барилгууд ногоон ороонгоор бүрэн хучигдтал маш их хугацаа өнгөрөх гэнэ. Хүн үгүй болсон эхний хэдэн 7 хоног хамгийн их "үймээн самуунтай” байх аж.

Эхлээд бүх цахилгаан станцууд зогсож гэрэл, дулаангүй болно. 1 тэрбум орчим гахай, 1,5 тэрбум илүү үнээ мал, 20 тэрбум тахиа шувуу зэрэг гэрийн тэжээвэр амьтад хашаа хорооноосоо гарч идэш тэжээл хайн бэлчинэ.

Гэрийн тэжээвэр амьтад хүнээс бүрэн хамаарч байсан тул шинэ нөхцөл байдалд дасан идээштэл хэцүү байх болно. Зарим нь аажмаар дасан зохицох боловч ихэнх нь зэрлэг амьтдын хоол болж дуусах магадлалтай. Мөн гэрийн нохой, муурнууд зэрлэг байгальд амьдрах чадваргүй. Яваандаа тэдний орыг зэрлэгшсэн муур, холимог цустай ноход болон чононууд эзлэх болно.

Хүмүүсийн хаясан их хэмжээний хог хаягдлаар хооллодог жоом, харх зэрэг амьтад хэсэг хугацааны дараа хоолгүй болж мутацид орох магадлалтай.  

Ногоон ургамал ирэхээс өмнө олон тооны байшин барилга, бүр бүхэл бүтэн хот, тосгон шатаж үгүй болно. Үүний тулд аянга цахилгаан хангалттай.

Өнөө үед Дэлхий дээр модон байшин олноор бий. 100 жилийн дотор ийм байшингууд үндсэндээ үгүй болно. Үлдэгдэл балгасыг шоргоолжнууд болон төрөл бүрийн бичил биетүүд эзэгнэх байх.

Харин ган, төмрөөр хийсэн бүх зүйлс: машин, гүүр зэрэг нь дараачийн ээлжинд үгүй болно. Будаг зэрэг байнгын арчилгаа тордлогогүйгээр төмөр нь агаарын хүчилтөрөгчтэй урвалд орж зэвэрнэ. Харин чийг багатай говь цөл дэх төмөр байгууламжууд арай удаан тэсч магадгүй.

Зам хагарч, газар доорх байгууламжууд (метро, цэвэрлэх байгууламж) усанд автана. Орчин үеийн байшин барилгууд дор хаяж 60 жилийн, гүүр 120 жилийн, далан 250 жилийн настай гэж үздэг ч зохих засвар үйлчилгээгүйгээр хурдан элэгдэлд орно. Салхи шуурга зэрэг байгалийн үзэгдэл ч өөрийн үүргээ гүйцэтгэнэ.

Хүн алга болсноос хойш 40-50 жилийн дараа ихэнх байшин нурж унах бөгөөд, зам харгуй, зогсоол нуранги балгасууд бүгд ороонго, бут, мод сөөгөөр хучигдана.

50 орчим жилийн дотор газрын гадаргуугийн 80% нь ой модоор бүрхэгдэнэ. Харин 200 жилийн дотор манай гараг бүхэлдээ ногоон бүрхүүлтэй болох аж.

Хэдэн мянган жилийн дотор Дэлхий дээр хүний гараар бүтсэн нэг ч зүйл үлдэхгүй. Дэлхий дээр 430 орчим ширхэг байдаг атомын цахилгаан станцууд дэлбэрэх ч үр дүн нь бидний төсөөлдгөөс нэг их аймшигтай биш байх аж.

Хүмүүсийн устгаж цөөрүүлсэн ан амьтдын тоо толгой хэвийн хэмжээнд хүрч ирнэ.

Харин хүмүүсийн оролцоотойгоор "нутаг сэлгэсэн”, эсвэл зоопаркаас "суллагдсан” амьтад шинэ орчиндоо дасан зохицож, өсөж үржих болно.

Биднийг явснаас хойш ердөө 2-3 долоо хоногийн дараа Дэлхийн агаар хамаагүй цэвэр болно. Гэхдээ л агаар мандалд их хэмжээгээр хуримтлагдсан нүүрстөрөгчийн давхар ислийн хий нь дахиад 1000 орчим жилийн турш байгаль орчинд нөлөөлсөөр байх болно.

Үүнээс хойш агаар мандал хэвийн хэмжээнд хүрч очих ч, цөмийн цахилгаан станц зэргээс ялгарсан радио идэвхт бодис өнө удаан хугацаанд байсаар байх болно.

Хүмүүс гэнэт алга боллоо ч арилшгүй ул мөрөө үлдээх ажээ