Дөрвөн настай охин тархиндаа цус харвалттай, биедээ гадны нөлөөтэй шарх сорвитой  Баянзүрх дүүргийн эмнэлэгт нас барсан хэрэг энэ сарын 21-ний өдөр гарсан билээ. Охины ээжийн найз нь цахим хуудсанаа энэ талаар бичиж оруулсан нь шуугиан тариад байгаа юм.  Олон нийтийн сүлжээгээр талийгаач охиныг төрсөн эцэг, хойд эхдээ зодуулж нас барсан гэж мэдээлж байгаа. Энэ сарын 18-нд  Хүүхдийн төлөө үндэсний газрын Хүүхдийн тусламжийн 108 дугаарын утсанд охины ээжийнх нь найз бүсгүй хандаж, мэдээлэл өгсөн аж.    Мэдээлэл 18-нд ирсэн ч охин гэмтлээ даалгүй энэ сарын 21-нд Баянзүрх дүүргийн эмнэлэгт нас барсан байна. Охины эцэг нь Баянзүрх дүүргийн цагдаагийн 2 дугаар хэлтэст шинжээчээр ажилладаг гэнэ. Хүүхдийн төлөө үндэсний газрынхан  эцгийг нь  охиноо хүчирхийлдэг байсан байж болзошгүй гэж таамаглаж байгаа юм байна. Учир нь  "Охины хярзан урагдалтай, хүчирхийлсэн" байх магадлалтай байгаа гэнэ.

ЦЕГ-ын Хэвлэл мэдээллийн төвийн ахлах ажилтан, цагдаагийн ахмад Ё.Лхагвасүрэн "Хэрэг энэ сарын 21-ний өдөр гарсан. Баянзүрх дүүргийн цагдаагийн хэлтэст мөрдөн байцаалтын ажиллагааг үргэлжлүүлж байна.  Өнөөдрийн байдлаар хоёр  хүнийг сэжигтнээр  тооцон цагдан хориод байгаа. Энэ хэрэг дээр Прокурорын байгууллага  хяналт тавьж байна. Задлан шинжилгээнд  оруулж дүгнэлт гаргуулахаар ажиллаж байна.  Мөрдөн байцаалтын ажиллагаа дөнгөж эхэлж байгаа учраас үүнээс  өөр мэдээлэл өгөх боломжгүй” гэлээ.        

www.times.mn