Өнгөрсөн баасан гарагт Улаанбаатарт хуралдсан Монгол-Оросын хамтарсан барилгын салбарын ажлын хэсгийн хуралдаанаар Оросын компаниуд манайд нийтдээ нэг тэрбум долларын барилгын тендер авч байгаа талаар уг ажлын хэсгийн Оросын талын ахлагч, тус улсын Барилгын дэд сайд Андрей Чибис хэлжээ. Хуралдаан эхлэхээс хэдхэн өдрийн өмнө Монголын Засгийн газар нийслэл Улаанбаатар хотын бохирын цэвэрлэх байгууламжийг шинэчлэх тендер зарласныг А.Чибис дурьдаад, хэдийгээр тендер дөнгөж зарлагдаад байгаа боловч "Уг тендерт Оросын "Мортон” хэмээх компани оролцоно, энэ компани тендерт ялна, энэ нь хоёр талын ажлын хэсгийн хүрээнд Монголд хэрэгжүүлж буй анхны томоохон төсөл болно” хэмээн мэдэгдсэн нь анхаарал татаж байна. Мөн "Мортон” компани "Яармаг” хорооллын барилгын ажил, нийслэлийн нийтийн тээврийн системийг сайжруулах төсөл, Улаанбаатарыг тойрсон засмал зам барих ажлуудыг гүйцэтгэх сонирхолтой байгааг дэд сайд дурьджээ. Харин ажлын хэсгийн Монголын талыг ахалсан Барилга, хот байгуулалтын яамны төрийн нарийн бичгийн дарга С.Магнайсүрэн "Монголд болж буй бүтээн байгуулалтын ажлуудад Оросын ард түмэн тусалж, хувь нэмрээ оруулж байгааг манай тал өндөр үнэлж байгаа” хэмээн тэмдэглэсэн байна. "Мортон” нь 25 жилийн түүхтэй, Оросын барилгын салбарын гурав дахь том компани бөгөөд өнгөрсөн онд 60 тэрбум рублийн борлуулалт хийж байжээ.