Өчигдөр Нийслэлийн прокурорын газрын олон нийттэй харилцах ажил хариуцсан хяналтын прокурор Г.Бясман олон нийтэд мэдээлэл хийсэн. Ерөнхий сайд асан С.Баяр, Ч.Сайханбилэг нарыг яллагдагчаар татан, цагдан хорих саналаа Сүхбаатар дүүргийн эрүүгийн хэргийн анхан шатны шүүхэд хүргүүлээд байгаа тухай дурдсан байна.

Харин дөнгөж саяхан зарим эх сурвалжид мэдээлснээр, Ерөнхий сайд асан С.Баярыг суллаж, харин 28 дахь Ерөнхий сайд асан Ч.Сайханбилэгийг үргэлжлүүлэн хорихоор болсон байна.

Ойрын өдрүүдэд баривчлагдан саатуулагдсан хүмүүсийн дийлэнх нь АН-ын гишүүд байсан учраас тус намын удирдлага дургүйцлээ илэрхийлээд амжсан. Харин өчигдөр орой Ч.Сайханбилэгийн хамт  МАН-ын нэгэн хүчирхэг лидер болох С.Баяр баривчлагдан саатуулагдлаа гэсэн мэдээллийг сонсоод тэд ялимгүй тайвширсан байж болох. 

Гэвч С.Баяр эрхэм ганц бүтэн хоног ч бололгүй суллагдсан бололтой. Зарим хүмүүсийн шоу" хэмээн эргэлзэж байсан таамаг ч батлагдлаа.  Уг нь хамгийн том "хэргийн эзэн, хэнгэргийн дохиур" нь  ТЭР байсан баймаар.

Гэхдээ ч С.Баярын оюуны чадамжийг баргийн хүн давж гарахад бэрх шүү. Дээхнэ, нөгөө "Цензургүй яриа"-нд нэг оролцохдоо баргийн "улаан хэлтэнг урдуураа гишгүүлдэггүй" Л.Мөнхбаясгаланг үнэхээр барьц алдуулж байгааг нь харахад бахадмаар л санагдсан. Тэгээд ч, АТГ-т түүнээс байцаалт аваад яс суулгачихаар оюуны бядтай байцаагч байдаг ч юм уу, үгүй ч юм уу хэн мэдлээ! Ямартай ч, хүчтэй хүн гэж цаанаа л өөр юм... 

Эх сурвалж Шуурхай.мн