Намын Ерөнхий нарийн бичгийн дарга хэмээх албан тушаалыг "муу” дүнтэйгээр хаасан Г.Занданшатар нэг л өдөр эрүүл мэндийн шалтгааны улмаас хэмээн дээрх албаа хүлээлгэж өгсөн. Эрүүл мэндийн шалтгаан гэдэг нь өнгөлөн далдлалт байсан бөгөөд намынхандаа бангадуулсны улмаас хүлээлгэж өгөхөөс өөр аргагүй болсон гэдгийг намынхан нь хэлдэг.

Тэгвэл өнгөрсөн хугацаанд АНУ-д номын дуу сонссон Г.Занданшатар гуай эх орондоо ирснийхээ дараа Ардчилалын алтан хараацай лугаа л болсон. Ардчилсан намын лидерүүдийн нэг болох Хотын мээр Э.Бат-Үүлтэй хамтарч төлөөллийн ардчиллыг тунхаглах болсон нь энэ бүхнийг бэлхнээ гэрчилнэ.

Ардчиллын хямрал сэдвээр халз мэтгэлцээнд УИХ-ын дарга З.Энхболдыг дуудаж, ардчилалыг тунхаглах болсон Г.Занданшатарын талаар улс төрийн хүрээнийхэн "Ардчилсан намд элсчихмээр юм” хэмээн ёжилж суугаа нь учиртай байж таарна.

Түүний санаачлан байгуулсан "Нэг монгол” ТББ-ыг нь Америкийн ардчиллыг дэмжих үндэсний сангаас санхүүжилт авдаг бөгөөд Г.Занданшатар ч энэхүү сангаас нь угжиж, сүүлийн үед ганцаараа цойлох болсон талаар ам дамжсан яриа Төрийн ордонд тарсан байна билээ.

Ямартай ч ажил, албан тушаалгүй болсныхоо дараа Г.Занданшатар АНУ-ын Стэнфордын их сургуулийн Зөвлөлдөх ардчиллын хүрээлэнгийн ахлах зөвлөхөөр ажиллаж,  АНУ-ын арчдиллын туршлагыг нэлээд судалж, Монголын  Ардчилсан намынханд лекц тавьж, мэтгэлцэх хэмжээнд хүртлээ төгсөрсөн бололтой юм.

Г.Занданшатар гэнэт явсан шигээ гэнэт л хүрч, ирж, хүчээр шахам Ардын намаас нэр дэвшинэ гэдгээ мэдэгдсэн. Ингэхдээ "Ардчилал”-аар лоозон хийж, Ардын намынхныг муухай харагдуулж байгаа нь намынх нь дарга болоод журмын нөхдөд нь тийм ч таатай санагдахгүй байгаа бололтой юм.

У.Жанцан