“Хүн Кен” хавиргаа авхуулахыг хүсчээ
Барбигийн найз залуутай адилхан болохын тулд эцэс төгсгөлгүй гоо сайхны мэс засалд шимтэх болсон 28 настай Маурисио Галди дахин нэг мэс засал хийлгэхээр болжээ. Гэхдээ энэ удаа түүний хийлгэхээр зэхсэн мэс ажилбар амь насанд нь аюул учруулж ч болзошгүй гэнэ. Эдүгээг хүртэл найман удаа гоо сайхны мэс ажилбар хийлгэж пластик тоглоомтой усны дусал мэт адилхан харагддаг хэдий ч үүндээ сэтгэл ханаагүй залуу дахин дөрвөн хавиргаа авхуулахаар болсон байна.
Энэ мэс заслыг хийлгэснээр цээж хэсэг нь Кентэй илүү адилхан болох аж. Залуу бага байхаасаа л Барбигийн найз залуу Кентэй адилхан болохыг хүсдэг байжээ. 17 настайдаа Маурисио жүжигчин болох гараагаа эхлүүлэх гэсэн боловч энэ санаа нь бүтэлгүйтсэн юм. Учир нь шалгаруулалт дээр түүнийг од болоход хангалттай царайлаг биш гэсэн аж. Дараа нь тэр насанд хүрээд өөрийн шийдвэрийг гаргаж, найман удаа мэс засал хийлгэж одоогийн дүр төрхөө олж авсан байна. Шинэ дүр төрх нь ч түүнийг нэр алдартай болгосон бөгөөд тэрбээр инстаграмм хуудастаа гэхэд 108 мянган дагагчтай болжээ.