Хотын шинэ дарга ажлаа хүлээж авлаа
Хотын даргаар томилогдсон С.Батболд өнөөдөр Нийслэлийн Засаг даргын Тамгын газарт хүрэлцэн ирж, Тамгын газрын хамт олны өмнө Улаанбаатар хотын 31 дэхь даргаар дөрвөн жил ажилласан Э.Бат-Үүлээс тамгаа гардаж авлаа. Энэ үеэр Монгол Улсын Ерөнхий сайдын захирамжийг Засгийн газрын Хэрэг эрхлэх газрын дарга С.Баярцогт танилцууллаа.
Энэ үеэр Э.Бат-Үүл хэлсэн үгэндээ, "Дарга нарын эрх мэдэл, үзэгний үзүүрт байсан төрийн үйлчилгээг бид нэг цэгт төвлөрүүлсэн нь нийслэлийн иргэдийн хамгийн их талархан хүлээн авсан ажил болсон. Тиймээс Нийслэлийн Үйлчилгээний нэгдсэн төвийн үйл ажиллагааг цаашид үргэлжүүлж, улам боловсронгуй болгоход анхаарч ажиллаарай. Мөн гэр хорооллын дахин төлөвлөт, "Сайн хашаа” хөтөлбөр, "Найрсаг Улаанбаатар” хөтөлбөрийг үргэлжүүлэхийг хүсээд, НЗДТГазар, нийслэлийн нутгийн захиргааны байгууллагын нийт албан хаагчдад баяр хүргэе" гэсэн юм.
Харин Нийслэлийн Засаг даргын үүрэгт ажлаа хүлээн авсан С.Батболд хэлэхдээ, "Төрийн алба бол тасралтгүй үргэлжлэх ёстой. Та биднийг Үндэсий их баяр наадам, АСЕМ-ын дээд хэмжээний уулзалтуудыг зохион байгуулах гэх мэт томоохон ажлууд хүлээж байна. Тиймээс төрийн албыг нэг хором ч тасалдуулагүйгээр цааш үргэлжлүүлэн явуулахыг та бүхнээс хүсэж байна. Монгол төрийн өлмий бат оршиж, Нийслэл Улаанбаатар хот маань улам цэцэглэн хөгжих болтугай" гэв.
Сэтгэгдэл байхгүй байна.