МАН-ынхны иргэдийн нүдийг хааж, чихийг бөглөх ажил хэзээ дуусах вэ
Харанхуй бүдүүлэг нийгэм ард хоцорч, бид мэдээллийн эрин зуунтай хөл нийлүүлэн алхаж байгаа. Тиймээс ч сүүлийн үед аль болох салбар бүрт ухаалаг системийг нэврүүлэхийг хичээж буй. Гэтэл МАН Засгийн эрхэнд очоод олон ухралт хийж буй. Үүний нэг нь өнөөх Шилэн дансны хуулийн хэрэгжилт.
Уг нь хэн хаана, хэчнээн төгрөг зарцуулав гэдгийг хэн ч ороод хянах боломжтой байсан. Өөрөөр хэлбэл, Шилэн дансны хууль хэрэгжсэнээр төрийн дансны ил тод байдал эрс дээшилсэн. Харин өнөөдөр УИХ-ын сонгуульд 65 суудал авч, төрийн том жижиг бүхий л албанд томилогдож байгаа МАН-ынхан "Шилэн” дансыг хөтлөх сонирхолгүй байна. Төсвийн зарлага, төрийн албаны гүйлгээгээ ил тод мэдээлэхдээ хойрго, хөшүүн хандах боллоо.
Өөр нэг зүйл нь УИХ-ын гишүүдийн ирцийн асуудал. Өнгөрсөн парламентын үед УИХ-ын гишүүдээс хэн чуулганы хуралдаанд оролцож, хэн нь хуралдаанаа тасалсан, чөлөө авсан, томилолтоор явсан байна гэдгийг www.parliament.mn сайтаар дамжуулж мэдээлж болдог байлаа.
Харин энэ удаагийн парламент чуулганд оролцож байгаа гишүүдийн ирцийг мэдээлэхээ болид удаж байна. Тодруулбал, хамгийн сүүлд тус сайтад өнгөрсөн наймдугаар сарын 30-нд буюу анхдугаар чуулганы УИХ-ын гишүүдийн ирцийн мэдээлэл тавигдсан байх жишээтэй.
Ийнхүү чуулганы ирцийг хяналтгүй болгосноор иргэд итгэл үзүүлэн сонгосон гишүүнээ хуралдаандаа суусан, тасалсан, зугаалсан, айлчилсан гэдгийг мэдэх боломжгүй болоод байна. Энэ мэт иргэдийг мэдээлэлгүй, харанхуй бүдүүлэг байлгах тэдний бохир арга хаа хүртэл үргэлжлэхийг хэлж мэдэхгүй юм.
Энэ мэтээр эрх баригчид өөрсдийг нь хянадаг иргэдийн "нүдийг хааж чихийг бөглөөд”, ирэх сонгуулиар "онц” дүн тавиулна гэж бодож байгаа бол эндүүрэл биз ээ.
Ж.Өөдлөн
mminfo.mn