АН-ын даргын өрсөлдөөн бүх гишүүдэд нээлттэй гэдгийг тус намын дарга З.Энхболд хэлсэн. Өөрөөс нь бусад бүх гишүүд намын даргад нэр дэвшиж, өрсөлдөж болно, ямар ч шалгуур тавиагүй гэх мэдээллийг сэтгүүлчдэд өгсөн билээ.

Тэгвэл Ардчилсан намын даргад өрсөлдөх хүсэлтэй хүмүүс өчигдрөөс эхлэн бүртгүүлж эхэлсэн байна.Харин өнөөдөр УИХ-ын гишүүн Ж.Батзандан "АН-ын даргад нэр дэвших бол урьдчилж 250 саяыг тушаах юм байна. Зардлын 10 хувь" хэмээн жиргэж, энэ асуудлаар сэтгүүлчдэд мэдээлэл хийсэн юм.

 

Тодруулбал, АН-ын даргад өрсөлдөх хүмүүс мөрийн хөтөлбөрөө 21 аймаг, есөн дүүргийн гишүүд дэмжигчдэдээ очиж танилцуулахад гарах зардлыг нэр дэвшигчид хувааж гаргана гэж байсан ч ийм босго тавьсан гэх мэдээллийг тэрээр өгсөн юм.

 

Тэгвэл дөнгөж сая Зам тээврийн сайд асан М.Зоригт АН-ын даргын сунгаанд өрсөлдөж буй нэр дэвшигчид 50 сая төгрөг хандивлана гэдгээ зарлалаа.

 Тэрээр энэ талаар "Намаа шинэчлэх хөтөлбөр, бодлого нь таалагдвал нэр дэвшигчид намын даргын сонгуулийн сунгаанд 50 сая төгрөг хандивлана” хэмээн өөрийн фэйсбүүктээ бичжээ.

Түүний энэхүү хандивыг зарим улс төр судлаачид "Монгол Улсын хувьд улс төрийн намыг бэхжүүлэх, үүний тулд намын санхүүжилтыг хариуцлагатай ил тод болгох, далд буюу хөшигний ар дахь бохир мөнгөний урсгалыг хязгаарлах нь ардчиллын төлөвшилтөд чухал нөлөөтэй билээ. Манай улс төрчдөөс анх удаагаа намдаа өгөх хандиваа, хандив өгч буй зорилгоо ил тод зарлаж байгаа Зам тээврийн сайд асан Мөнхчулууны Зоригтын энэ санаачилгыг цаашид дэмжээд явах нь зүйтэй санагдана. Намын санхүүжилт шилэн байхын хэрээр намд хариуцлага тооцох боломж өндөрсөнө" хэмээн үзэж буйгаа илэрхийлжээ.

eagle.mn