Өнгөрөгч 2024 онд нийслэл хот 500 тэрбум төгрөгийн бонд босгож, үүний 300 тэрбумыг Д.Баясгалангийн эзэмшлийн "Бодь” группийн хэрэгжүүлж буй "Бөөрөлжүүт” цахилгаан станцын төсөлд хуваарилсан. Харин энэ жил Хөгжлийн банк өөрийн 500 сая ам.долларын бондын тодорхой хэсгийг мөн "Бөөрөлжүүт”-ийн өргөтгөлд чиглүүлэхээр судалгаа эхлүүлжээ. Эх сурвалжийн мэдээллээр, тус төсөл нь 3, 4-р блок буюу нийт 300 МВт-ын хүчин чадалтай цахилгаан станцыг барихад шаардлагатай санхүүжилтийн гол объект болж байгаа бөгөөд шийдвэр гарахад аль хэдийн дээд түвшинд тохирсон байж болзошгүй байна.

"Бөөрөлжүүт” өргөтгөлийн 3-р блок 2027 онд, 4-р блок 2028 онд ашиглалтад орж, нийслэлийн цахилгаан эрчим хүчний ачааллыг мэдэгдэхүйц бууруулах боломжтой юм. Хөгжлийн банкнаас гаргасан мэдээллээр, энэ оны 500 сая ам.долларын бондын санхүүжилтээр өндөр хүүтэй өмнөх бондуудыг дахин санхүүжүүлэх, эдийн засгийн тогтвортой байдлыг хангах томоохон төслүүдийг дэмжих зорилготой. Гэвч "Бөөрөлжүүт” төсөл нь төр, банк, хувийн хэвшлийн оролцоог нэгтгэсэн стратегийн цэг болоод байна.

Эх сурвалжийн мэдээллээр, Д.Баясгалан өөрийн компанийн хүрээнд боломжуудыг бүрэн хамдаж, хотын бонд, Хөгжлийн банкны хөрөнгө, төрийн төслүүдийг нэгтгэн ашиглаж байгаа нь илт байна. Өнгөрсөн өвөл нийслэлд эрчим хүч тасрах эрсдэл өндөр байсан нь уг төслийг зайлшгүй дэмжих нөхцөл болж, хотын удирдлага босгосон бондын 300 тэрбумыг шууд "Бөөрөлжүүт”-т чиглүүлсэн.

Нэмж хэлэхэд, Д.Баясгалангийн компаниуд өнгөрсөн жил улсын төсвөөс 55 тэрбум, 2025 онд 7.3 тэрбум төгрөгийн бэлтгэн нийлүүлэлтийн ажил авсан бөгөөд төмөр зам, дэд бүтэц зэрэг томоохон төслүүдээр дамжуулан хувийн бизнес, төрийн санхүүжилт, боломжуудыг нэгтгэн ашиглаж байгаа нь ажиглагдаж байна. Энэ байдлаар Д.Баясгалан "Бөөрөлжүүт”-ээр дамжуулж боломжуудыг бүхэлд нь хамдаж, санхүүжилт, төсөл, төрийн оролцоог нэгтгэн ашиглах замаар стратегийн давуу байдлыг бий болгожээ.