Төрөлхийн нуруу нугасны гажигтай, бөгтөр нуруутай өдийг хүрсэн хятад залуугийн мэс засал амжилттай болжээ. "South China Morning Post” сонины мэдээлснээр, Хятадын Шаньдун мужийн жижиг тосгонд төрсөн, эдүгээ 22 настай Жан овогт сүүлийн хоёр жил нуруу тэгшлэх мэс засал болон нөхөн сэргээх эмчилгээ хийлгэсний дүнд бүтэн биеэрээ цэх зогсож чаддаг болсон бөгөөд эмч нар түүний бэлхүүс, нуруу, хүзүү, хонго, цээжний зарим ясыг хугалж, дахин эвлүүлэх хагалгаа хийсэн байна. Тэрбээр бага насандаа эмнэлгийн зохих тусламж авч чадаагүйгээс ийм гажигтай болсон гэнэ. Гэвч хүү сургуульд орж, хэвтээгээрээ хичээлээ үзэн шантралгүй суралцсаар 2022 онд төрөлх хотынхоо их сургуулийн эрчим хүчний инженерийн ангид элсэн оржээ. Ээж нь хүүгээ асрахын тулд багшийн ажлаа орхиж, улмаар хүүгийнхээ тухай бичлэг хийн цахим сүлжээнд нийтэлсний дараа эмч нар мэс засал хийх санал тавьсан байна. Ясны гажилтын эмчилгээний мэргэжилтэн, профессор Лян Жян хүүг гардан эмчилж, өнгөрсөн зургаадугаар сард сүүлчийн хагалгааг хийжээ. Одоогоор биеийн байдал сайн нь, зүрх судасны үйл ажиллагаа хэвийн байгаа бөгөөд нуруу нь бүрэн тэнийж, орон дээр цэх шулуун хэвтэж чаддаг болсон байна. Энэ нь 180 градусын нурууны ортопедийн мэс засал дэлхийд анх удаа хийгдсэн явдал болохыг мэргэжилтнүүд онцолжээ. Сүүлчийн хагалгааны дараа тэрбээр дэмжигчидтэйгээ олон нийтийн сүлжээгээр шууд харилцан, анх удаагаа өөрөө алхаж буй бичлэгээ хуваалцсан байна. Тэрбээр "Надад дахин төрснөөс өөрцгүй байна" гээд, их сургуулийн элсэлтийн шалгалтыг хэвтээгээрээ өгч байсан бол одоо төгсөхдөө босоогоороо шалгалтаа өгнө гэдгээ хэлжээ.