Дорнод аймгийн Дашбалбар сумын төвөөс зүүн тийш 20 км зайд орших Чух нуураар дайран өнгөрсөн шувуудын намрын нүүдэлд судлаачид өнгөрөгч долоодугаар сарын 19-нөөс наймдугаар сарын 31-ний хооронд ажиглалт явуулжээ. Энэ хугацаанд тус нуурын дэргэд үйл ажиллагаа явуулж буй шувуу судлалын суурингийн ажилтнууд нийт 18 зүйлийн 112 бодгаль эргийн шувуу, бусад 15 зүйлийн 91 бодгаль шувуудыг барьж бөгжилсөн байна. Мөн олон улсад ховордож болзошгүй ангилалд багтсан Азийн цууцил шувууны хоёр бодгальд сансрын дамжуулагч зүүн нүүдэл, шилжилт хөдөлгөөний талаарх мэдээллүүдийг цуглуулж байгаа аж. Шувуу судлах энэхүү суурин Монгол орны зүүн бүсийн ховор шувуудыг судлах зорилгоор 2017 оноос үйл ажиллагаа явуулж, улирал бүр ажиглалт, судалгаа хийж байгаа билээ. Тэгвэл энэ улирлын ажилд Монголын гар далавчтан судлах төвийн судлаач Н.Нандин-Эрдэнэ, МУБИС, МУИС-ийн гурван оюутан, "Томужин альтернатив" сургуулийн сурагчид, сайн дурын ажилтнаар Германы иргэн Кристан Ситтер, Францын иргэн Пабло Маурин, Хятадын иргэн Сун Ран нар оролцжээ. Шувуу судлалд барьж бөгжлөх, харж бүртгэх, тэмдэглэх, сансрын радио дохио дамжуулах төхөөрөмж суулгах аргуудыг түгээмэл ашигладаг бөгөөд жижиг шувуудыг барьж хөлд нь бөгж зүүн тоо толгойг нь бүртгэснээр тэдний амьдралын түүх, насжилт, нүүдэл, шилжилтийг хянадаг байна.