Эвийн таван сумтай эхлэсэн АН-ын даргын сунгаанд өрсөлдөгчдийн хоёр нь сурталчилгааны төгсгөл дээр өнөө сумаа бие бие рүүгээ тавьчихав бололтой. 1 дүгээр сарын 27-нд сурталчилгааны хаалтын үеэр нэр дэвшигч С. Эрдэнэ, Н.Алтанхуяг нар бие бие рүүгээ эрээ цээргүй дайрчээ. Гишүүд, дэмжигчдийнхээ өмнө тэд бие биенээ "бүлэглэлийн эрх ашигт үйлчлэгч”, "хулгай луйвраа хамгаалагч”, "аалзны тор шиг эрх мэдэл хамагч” зэргээр цоллон бие биенийхээ фракцыг үгүй болгохын тулд "эцсээ хүртэл” "дайн зарлаж” "хатуу тэмцэх”-ээ чанга дуугаар мэдэгдлээ.

 

АН-ын даргаар энэ хоёрын аль нэг сонгогдвол хэрүүл тэмцэл, өс хонзон намаас салахгүй гэдэг нь тодорхой боллоо гэж үзэгсэд ч байна. Тэдний бие биеэ хэмлэсэн үгийг сийрүүлэн хүргэе.

Н.Алтанхуяг: -Монголын баялагийг луйвардсан ажиллагаа нотлогдоод УИХ-аар хэлэлцэх тухай яригдахад манай АН-ын бүлгийн дарга завсарлага авсныг монголчууд эсэргүүцэж хүлээж авлаа. Нам дамнасан бүлэглэлийн эрх ашигт үйлчилдэг бүлгийн даргатай болчихоогүй байгаа даа гэж гишүүд маань гайхаж, эмзэглэж байна. Эрдэнэтийн 49 хувийг хулгайлсан бүлэглэл хулгай луйвраа АН-аар хамгаалуулах гэж байгаа бол тийм юм байхгүй гэдгийг хатуу хэлчихье.

Хариуд нь С.Эрдэнэ: -Өнгөрсөн 10-аад жилд "Алтан гадас” хэмээх нэг фракц бүх эрх мэдлийг аалзны тор мэт хамж авсан. Энэ аалзны торыг задлахын төлөө бид тэмцсэн. Цаашдаа тэмцэх болно.