Ардчилсан намын шинэ удирдагч энэ сарын 29-нд болох санал хураалтаар тодорно. Нэр дэвшигчийн сонгуулийн сурталчилгааны ажил ид өрнөж байгаа энэ өдрүүдэд намын гишүүд би чи, манайх танайхаараа ялгарч хар нь харыгаа шар нь шарыгаа дэмжиж, сурталчилгааны компанит ажилд нь туслаж яваа сурагтай. Тоон дотор үсэг цохиж явна гэдэг шиг дэмжигчдийн дунд нэг содон "нөхөр” яваа нь "Бүгд найрамдах нам”-ын дарга Б.Жаргалсайхан. Тэрээр өнөөдөр Өвөрхангай аймагт болсон иргэдтэй уулзах уулзалтан дээр С.Эрдэнийг дэмжихийг уриалж, уулзалтад ирсэн 200 гаруй хүнд ноолууран цамц тараалаа . Байгуулсан намаа буулгаад ардчилсан намд орохоор бадар барьж яваа Б.Жаргалсайханы сонголт С.Эрдэнэ бөгөөд түүнийг "цахиур төмөр” хэмээн бодож явдаг тухайгаа ч ярьж, шилийн сайн эрээ дэмжихийг ухууллаа.

Сонгуульд нэр дэвшигчид тухайлсан штаб байгуулахгүй учраас тус бүрдээ итгэлтэй хүндээ сурталчилгааны ажлаа даатгаж байгаа. Шударгаар өрсөлдөх уриатай намын даргын сунгаанд "шулам” болж орж ирсэн Б.Жаргалсайханы энэ үйлдэл тус биш ус болж, С.Эрдэнэ намын даргын суудлыг худалдаж авахаар санаархаж байна гэсэн бор шувуу хэдийн нисээд эхэллээ. Нам доторх акулуудын нэг "Эрдэнэ ван”-д орогнол хүссэн Б.Жаргалсайханаас өөр даацтай дэмжигч олдсонгүй юу

Н.Мөрөн 

Tonshuul.mn