Монголын үндэсний бөхийн холбооны тэргүүн Р.Нямдорж цол худалдаж авахыг санаархсан тухай дуулиан хаачив. Уг нь, арслан Х.Мөнхбаатарыг шүүхэд өгнө "Нэр хүндээ сэргээлгэнэ” хэмээн олон нийтийн мэдээллийн хэрэгслээр удаа дараа хандаад байсан билээ. Үйл явдлыг эргэн санавал холбооны тэргүүн 2007 оны наадмаар өөрийн хүүдээ заан цол авч өгөх гэж Хөвсгөл нутгийн залуу арсланд 70 сая төгрөгийн үнийн санал хэлж байжээ. Нотлоход хэцүү энэ баримтыг Х.Мөнхбаатар шарандаа хэлсэн үү, эсвэл гүтгэсэн үү гэсэн санал асуулга цахим хуудсуудаар хүчтэй өрнөсөн. Гэвч тухайн үед Х.Мөнхбаатарыг худал хэлсэн гэдэгт санал нийлэх хүн ганц ч гарахгүй байгаа нь тэдний маргаанд дүн тавьж болох анхны шан мөн байж ч болох байв. Өөрөөр хэлбэл бөхийн холбооны тэрүүн нь өөрөө цолны найраа хийхийг санаархаад гүйж явна гэдэг зүлэг ногоон дэвжээн дээр, тэр дундаа түмний хайр хүндэтгэлийг хүлээсэн хүчит эрчүүдийн амнаас ямар бузар үг гардаг нь тодорхой. Ийнхүү зүлэг ногоон дэвжээн дээр байдаг хатиг, бэтгийг хага татсанынхаа төлөө харин Хадбаатарын хүү Мөнхбаатар гэгч эр худалч нэгэн болж хувираад байна.

Үнэндээ Монгол бөхийн холбоо бөхчүүдийн өмч үү, аль эсвэл Р.Нямдоржийн бизнес үү гэдэг асуудал олон жил яригдаж буй. Үүнд ч нутаг нутгийн олон хүчтэн эмзэглэж, Х.Баянмөнх аварга, улсын заан Ж.Ганболд тэргүүтэй олон бөх Р.Нямдоржоос монгол бөхөө аврах "аян” өрнүүлээд амжилтгүй болсон. Үүний няцаалт нь үнэндээ инээдтэй зүйл байсан тухай ч ойрын эх сурвалж өгүүлсэн. Учир нь Р.Нямдорж болоод түүний багийнхан өөртэй нь тэмцэл өрнүүлсэн улс аймгийн бөхчүүдийг "Увстөржлөө” гэсэн үндэслэлээр нухчин дарсан тухай ч яриа бий. Мөн залуу аварга А.Сүхбат түүнтэй таарамж муутай байсан болоод ногоон дэвжээгээ орхисон тухай ярилцлагыг ч мөн өгч байв. Тиймдээ ч Монгол бөхийн холбооны боссыг АТГ-аар шалгуулах хүсэлт гаргаж, Төв цэгэлдэх хүрээлэнд шударга наадахыг уриалсан лоозон барьж гарч ирсэн билээ. Бүр зарим нэг улсын цол горилж яваа залуу түүнийг зөвхөн өөрийн хүүдээ зориулж барилдааны дүрмийг өөрчилдөг боллоо гэсэн шүүмжлэлийг ч гаргасан нь нэг бус удаа. Үүнийг харин ямар нэгэн хувь хүний "өс” хэмээн ойлгож болох хэдий ч ногоон дэвжээгээр Р.Нямдорж "ногоон” олдог уу гэдэг асуулт өнөөг хүртэл асуултын тэмдэг дагуулсаар байна. Магадгүй Х.Мөнхбаатарын хэлсэн үнэн бол Р.Нямдорж өөрөө Төв цэнгэлдэх хүрээлэнг баяр наадмын хоёр өдөр зохион байгуулалттайгаар "Нарантуул 3” худалдааны төв болгон ашигладаг болж таарах гээд байгаа юм. тэгвэл бас нэгэн баримттай жишээг өгүүлэхэд өнгөрсөн хавар "АСА” циркт хэдэн залуус холбоо байгуулаад үндэсний бөхийн багийн барилдаан гээчийг анх улдаа санаачилан зохион байгуулахад нь Монголын үндэсний бөхийн холбооны зүгээс "биднээс эрх аваагүй олохоор хууль бус” хэмээн дарамт үзүүлсэн нь бий. Тэр ч бүү хэл бөх тайлбарлагч, засуул, хөлийн цэцүүдээ тус барилдаанд оролцвол ажлаас чинь хална хэмээн дарамталсан байх юм. Тэгэхээр ургийн баяр хийж, хэдэн хүүхдүүд барилдуулахад хүртэл Р.Нямдоржид мөнгө төлж байж эрх авах болж таарч байгаа юм уу даа янз нь.

Үүнээс гадна түүний олж байгаа орлого багагүй гэдэгтэй олон бөх санал нийлдэг. Тухайлбал Монгол бөхийн өргөөний гадна талд сурталчилгааны самбар байрлуулахад л сая төгрөгөөс дээш үнэтэй. Урлагийн тоглолт цэнгүүн зохион байгуулах юм бол дунджаар дөрвөн сая төгрөг байдаг аж. Үүнээс гадна долоо хоног бүрийн амралтын өдөр алгасахгүй ямар нэгэн байгууллагын нэрэмжит барилдаан болдог учир зохион байгуулагчийн зүгээс танхим ашигласан төлбөр, дээрээс нь үзэгчдийн тасалбарын нэгж үнэ 6500 төгрөг гэх мэтээр тооцвол тоо бодож сууснаас тоосго өрж сурсан нь дээр хэмээн үздэг болсон манайханд төөрмөөр их тоо гарч ирэх нь дамжиггүй. Яг л төв гандангийн өргөл барьцыг тогтоох боломжгүйтэй адил бөхийн өргөөнд орж, гарч байгаа мөнгийг барагцаалах боломж Р.Нямдоржоос бусад хүнд байдаггүй. Тэгсэн атлаа ажилчид нь "Урамшуулалаар цалинждаг” хэмээн хүнлэг дүр эсгэх нь үнэндээ зохимжгүй. Тэгээд ч тэдний урамшуулал хэмээн нэрлэдэг мөнгө нь хэд байх вэ гэдэг нь бүрхэг. Ухаандаа монгол бөхийн хөгжүүлэх гэсэн чин сэтгэл байхад мөнгө төгрөг сонин биш гэсэн сэдлийг олон хүнд түгээж, өрөвдүүлэхийг хүсдэг ч байж болох юм. Ямартай ч гагцүү үнэн бол Монголын үндэсний бөхийн холбоо гэдэг хувийн компанийн ажилчид төрийн албан хаагчийн цалингаас бага урамшуулалтай байна гэж үгүй.

Чухам энэ их мөнгийг бөхчүүдэд, тэдний бай шагналд зарцуулж байна уу, гэвэл бүгд л толгой сэгсэрдэг. Тэгээд ч Монголын үндэсний бөхийн холбооноос санаачлан мод тарьж, хүмүүнлэгийн аян өрнүүлж байна гэж хэн ч сонсоогүй. Харин ч Бүр эсэргээрээ бай шагнал хангалтгүй, бодлого шийдвэр дутмаг гэдэг шалтгаанаар эр бяр нь жигдэрч яваа олон бөх бизнес хөөгөөд сураггүй болсон тухай ч хүн бүр мэднэ.

 Д.Бугат

Эхсурвалж: tonshuul.mn