АНУ-ын Тагнуулын төв газрын ажилтан асан, Зөвлөлт болон ОХУ-ын талд нууцаар ажиллаж байгаад илчлэгдэн шоронд ял эдэлж асан Олдрич Эймс 84 насандаа нас барсан талаар BBC агентлаг мэдээллээ. Хүйтэн дайны үеийн хамгийн цуутай тагнуулчдын нэг О.Эймс 1960-аад оноос ТТГ-т ажилласан бөгөөд 1985 онд Зөвлөлтийн нууц албанд элсэн Америкийн тагнуулын маш нууц мэдээг оросуудад дамжуулж эхэлсэн байдаг. Асар үнэ цэнтэй мэдээ баримт дамжуулсныхаа төлөө тэрбээр олон мянган доллар, тансаг харш, үнэтэй машин авч байв. О.Эймс Оросын нууц албанд шургалсан Америкийн 10 гаруй тагнуулыг оросуудад илчилж өгсөн бөгөөд түүний мэдээллийн дагуу оросууд Америкийн тагнуулын 100 гаруй тусгай ажиллагааг урьдчилан мэдсэнээр таслан зогсоожээ. 10 шахам жил баригдалгүй явж ирсний эцэст О.Эймс 1993 онд эхнэрийн хамтаар илчлэгдэн баривчлагдсан юм. 1994 онд шүүхээс бүх насаараа хоригдох ял авахдаа тэрбээр 53 настай байв. Москвагийн тусын тулд байгуулсан гавьяаг нь үнэлэн түүнийг солилцоогоор авах санал ОХУ-д нэг бус удаа гарч байсан боловч албан ёсоор ажил хэрэг болоогүй билээ. О.Эймс магадлангаар орох эрхгүйгээр яллагдсан бөгөөд Мэрилэнд мужийн засан хүмүүжүүлэх газар 31 жилийн турш хоригдсоны эцэст өнгөрөгч даваа гарагт нас баржээ. Өнгөрсөн хугацаанд АНУ, ОХУ-д түүний тухай хэд хэдэн кино, 20 шахам ном гарсан байна.