Монгол улсын аварга Г.Өсөхбаярын хүү, өнгөрсөн Хацү башёд макүшитагийн зүүний 2-оос босч барилдсан Тошинофүжи Ө.Дэмиджамц тав давж, хоёр ялагдсанаар жюүрёо зиндаанд дэвшлээ. 2000 онд төрсөн, Тошинофүжи мэргэжлийн сүмогийн Исэгахама дэвжээнд 2024 оны гуравдугаар сард элссэн бөгөөд өнгөрсөн хугацаанд 77 барилдсанаас 54-д нь ялжээ. Түүний голлон хийдэг мэх нь ёрикири, шитатэнагэ хэмээн Японы мэргэжлийн сүмо бөхийн холбооны мэдээллийн санд дурдсан байна. 195 см өндөр, 141 кг жинтэй түүнийг Японы хэвлэлүүд царай төрх, нуруу чацаар Хакүхогийн залуу үеийнхтэй тун адилхан байна хэмээн бичжээ. Жюүрёо зиндаанд өнөөдөр Монголын бөхчүүдээс Тамашохо, Кёокүкайюү, Дэванорюү нар барилдаж байна.