Монголбанкны ерөнхийлөгч Н.Золжаргал арилжааны банкуудад шалгалт хийлгэхгүй байх хүсэлтийг Ерөнхий сайд Ч.Сайханбилэгт болон Шадар сайд тэргүүтэй бусад хүмүүст явуулжээ. Учир нь ШӨХТГ-аас арилжааны банкуудын авдаг нэг хувийн шимтгэлийг хууль бус гэж үзэн шүүхэд өгөөд байгаа билээ. Харин Монголбанкны ерөнхийлөгч хүсэлтдээ "ШӨХТГ банкуудыг шалгах эрхгүй, ийм учраас зохих арга хэмжээг авч өгнө үү” хэмээсэн байна. Үүнийг харин Шударга бустай тэмцэх газар шүүхийн шийдвэрт зориудаар нөлөөлөхийг оролдож байна хэмээн үзээд байгаа гэнэ. Тэгвэл өмнө нь хоёр шатны шүүх арилжааны банкуудыг ШӨХТГ-аас Өрсөлдөөний тухай хуульд заасны дагуу шалгах эрхтэй гэсэн дүгнэлт гаргасан байна. Ийм байтал төв банкны ерөнхийлөгч удирдах төвшний дээд албан тушаалтнуудад хүсэлт тавьсан нь энэ хэргийг арилжааны банкуудад ашигтайгаар шийдэх гэсэн санаархал ч байж болох юм. Уг нь Монгол банкны зүгээс банкуудын үйл ажиллагаан дээр хяналт тавих чиг үүрэгтэй субьект. Тэгээд ч өмнө нь хоёр шатны шүүх арилжааны банкуудыг хууль зөрчсөн гэсэн дүгнэлт гаргасан. Харин өнгөрсөн сард Монгол Улсын шүүх өмнө нь гаргаж байсан шийдвэрээсээ буцсан нь түүний нөлөөлөл орсон байх магадлалтай хэмээн маргаан үүсгэгч тал үзэж буй аж. Тодруулбал ижил шатны шүүх, ижил хэрэг дээр ганцхан жилийн дотор хоёр өөр дүгнэлт гаргаад байгаа юм.

Л.БАТ