Сүүлийн хоёр долоо хоногийн дотор Армен, Израиль, Франц Улсуудаар аялсан Ким Кардашьян Лос-Анжелес хотод эргэн очжээ. Удалгүй тэрбээр шинэ худалдан авалт хийсэн байна. Реалити шоуны од бүсгүй Rolls Royce Phantom загварын төмөр хүлэгтэй болсон аж. Ийнхүү Ким бүсгүйн автомашины цуглуулга люкс ангиллын өөр нэг машинаар баяжив. Энэ загварын жирийн тоноглол бүхий машин 407 мянган долларын үнэтэй билээ.


Мэдээж, Кардашьян элдэв нэмэлт тоноглолуудыг суулгасан нь ойлгомжтой. Мэргэжилтнүүд 34 настай армян бүсгүйн шинэ машиныг хагас сая доллараар үнэлжээ. Гэхдээ энэ нь Ким бүсгүйн цуглуулгад багтсан анхны фантом биш юм. Дээдсийн хүүхэнд өөр хоёр ч Rolls Royce байдаг аж. Түүнчлэн Ким Лос-Анжелес хотын гудамжаар цагаан өнгийн Ferrari, хар өнгийн Lamborghini, Range Rover, Mercedes-Benz G63, Bentley Continental GTC машинуудаар салхи татуулан давхиж байлаа.