АНУ-ын Үндэсний аюулгүй байдлын агентлаг Америкчуудын аюулгүй байдлыг бүрэн хангахын тулд холбоотон орнуудаа тагнаж байсан тухай ноцтой мэдээллүүдийг бид 2013 оноос хойш мэддэг болсон.

Тэгвэл энэ удаа Wikileaks сайт дээр тавигдсан мэдээлэлд зөвхөн Европчууд гэлтгүй Японыг тагнаж байсан тухай, дээрээс нь Японы ерөнхий сайд Шинзо Абе, түүний парламент мөн Mitsubishi компанийг хүртэл тагнаж байсан тухай бичжээ.

2006 оноос хойш АНУ Япончуудын цаг уурын өөрчлөлтийн эсрэг явуулж байгаа бодлогыг илүүтэй сонирхож байсан аж. Үүний дунд Ерөнхий сайд Шинзо Абегийн 2050 он гэхэд хүлэмжийн хийн ялгарлыг 50 хувиар бууруулах төсөл хүртэл багтаж байна.

Энэ талаарх мэдээллийг Японы гадаад хэргийн яам АНУ-д хүртэл мэдэгдэхийг хүсээгүй бөгөөд Их наймын уулзалтын үеэр ч ам нээж байгаагүй аж. Хүлэмжийн хийн ялгарлыг бууруулахын тулд үйлдвэрлэл, тээврийн салбарт томоохон өөрчлөлтүүд хийх бөгөөд иргэдийн амьдралын хэмнэлийг хүртэл өөрчлөх зорилт тавьсан байжээ.

Ийнхүү АНУ өөрийн холбоотон болох Их Британи, Австрали, Канад, Шинэ Зеланд, Япон зэрэг бүхий л улсыг тагнаж байсан нь илэрснээр дараагийн удаагийн дээд хэмжээний уулзалт тун ч хэцүүхэн болох нь дамжиггүй юм.

Wikileaks сайтыг үүсгэн байгуулаг Жулиан Ассанж өөрийн мэдэгдэлдээ "Япончуудын энэхүү явдлаас бид маш том сургамж авлаа. Аливаа дэлхий дахиныг хамарсан тагнуулын ажиллагаа гэдэг ямар ч хүндлэл, нэр хүнд гэдэг зүйлд захирагддаггүй аж. Зөвхөн ганцхан л дүрэм бий. Тэр нь ямар ч дүрэмгүй” гэжээ.