Ерөнхий сайд асан Н.Алтанхуягийн ахлах зөвлөх Л.Гансүх нарт холбогдох хэргийн шүүх хурал Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд эхэллээ. Хэрэгт шүүгчээр Х.Идэр, өмгөөлөгч Ц.Баасандорж нар оролцож байна. Шүүх хуралд Л.Гансүх өөрийн биеэр хүрэлцэн ирсэн боловч Л.Гансүх нарын өмгөөлөгчдийн зүгээс шүүх хуралд Ерөнхий сайд асан Н.Алтанхуяг болон Налайхын нүүрсний уурхайн удирдлагууд, шинжээчдийг оролцуулах хүсэлт гаргаж, хурлыг хойшлуулж өгөх хүсэлтийг шүүх бүрэлдэхүүнд уламжилсан юм. Шүүх бүрэлдэхүүн хүсэлтийг хүлээн авч, шүүх хурлыг энэ сарын 17-ны  өдөр хүртэл хойшлууллаа.

Л.Гансүх нарын арван хүнийг "Нүүрс” хөтөлбөр нэрээр их хэмжээний мөнгө завшсан гэх үндэслэлээр АТГ-ын Мөрдөн шалгах хэлтэст Эрүүгийн хэрэг үүсгэн шалгаж байсан. Улмаар хэргийг шалгаж дуусаад "MGLSBD” компанийн захирал, Л.Гансүхийн туслах Н.Даваахүү, Л.Гансүхийн эхнэрийн дүүгийн хүүхэд болох "MGLSBD” компанийн ерөнхий нягтлан бодогч Б.Мөнгөнтуяа, Л.Гансүх нарын гурван хүнийг төрийн албан тушаалтан хүн албан тушаал, эрх мэдлээ урвуулсан, татвар төлөхөөс зайлсхийсэн гэмт буруутай байж болзошгүй хэмээн яллах дүгнэлт үйлдүүлэхээр прокурорт шилжүүлсэн билээ. Харин прокурор хэргийг хянаж дууссанаар шүүхэд шилжүүлсэн нь энэ юм.