Энэ жилийн Үндэсний их баяр наадамд алдарт дуучин Женифер Лопезийг нэг сая ам.доллар /хоёр тэрбум төгрөг/-аар урин авчирч наадмын нээлтэд дуулуулахаар болсон тухай мэдээлэл зарим хэвлэл мэдээллийн хэрэгслээр гарч, твиттер, фэйсбүүкийн ярианы гол сэдвүүдийн нэг болоод байна.

Нэгэнтээ чуулганы хуралдаанд мэдээлэл хийх үеэрээ Ерөнхий сайд Ч.Сайханбилэг Үндэсний их баяр наадмын үеэр гадаадын одод ирж дуулж хуурдана, дэлхий манай наадамд анхаарал хандуулж энэ утгаараа жуулчдыг татах болно гэсэн утгатай үгс хэлж байсан нь үнэн. Уг нь ч санадаг л санаа. Алийн болгон жил бүр Со гавьяатын найруулаад өөрөө гарч биелэхийг харахав дээ.

Дэлхийн энтэй сэтгэж, холын юмыг харая л даа. Гэхдээ нөгөөтэйгүүр ганц дуучин ирэхийн төлөө хоёр тэрбум төгрөг тавиад туучихна гэхээр харамын сэтгэл хөдлөөд болдоггүй. Одоо яая гэхэв дэлхийн ханшаар үнэлэгдсэн дэлхийн дуучин юм хойно.

Эдийн засаг хямарсан, элгээрээ хэвтсэн ард олон өндийх гэж ядаж яваа үед хоёр тэрбум төгрөг зарцуулан гадаадын дуучин авчирна гэдэг нээрээ л хэцүү юм. Дээрээс нь Женифер Лопез 50 гаруй тэрбумаар өгзгөө даатгуулсан гэж байгаа. Гай болж саваагүй нэг нь дэлхийд алдартай өгзгөнд гар хүрээдэхвэл жинхэнэ асуудал үүснэ биз. Тэгвэл манай улсын эдийн засаг жинхнээсээ хэцүүднэ дээ.

Уг нь ч манай төрийн томчууд хямарч, ядаж яваа ард түмнээ баясгах сэтгэлээр л хаа холын цуутай дуучныг урьж авчрах гэж бодоо байлгүй. Хэрвээ энэ явдал үнэн болох нь батлагдвал твиттер, фэйсбүүкчдийн мөнхийн "гал" дүрэлзэн асах нь ээ гэж.

Б.Шимээл

bataar.mn