Ерөнхийлөгчийн сонгуульд нэр дэвшигч Х.Баттулга саналын тоогоор тэргүүлсний дараа Монголын эдийн засагтай холбоотой зарим нэг таагүй мэдээ гадаад ертөнцөд дуулдаж эхлээд байна. Учир нь хэрэв Х.Баттулга Ерөнхийлөгчөөр сонгогдлоо гэхэд МАН олонх болсон ийм нөхцөлд бодлогоо яаж хэрэгжүүлэх нь туйлын тодорхойгүй хэмээн үзэж буй бололтой. Ерөнхийлөгч хэн болохоос үл хамааран Олон улсын Валютын сангийн хөтөлбөрт өөрчлөлт орохгүй ч  олон улсын хөрөнгийн биржид бүртгэлтэй Монголын хөрөнгө оруулалттай компаниудын хувьцааны ханш мягмар гарагт огцом унасан.

Үүнтэй зэрэгцэн Монгол Улсын Засгийн газрын гаргасан "Хуралдай” бондын ханш 1.1 нэгжээр унажээ. Энэ нь тус бондын хувьд хамгийн огцом уналтад тооцогдож байна. Эргэн сануулахад  600 сая ам.долларын "хуралдай”бондыг 8.75 хувийн хүүтэйтэйгээр  өнгөрөгч гуравдугаар сард гаргасан юм. Лхагва гарагт Хонгконгийн Хөрөнгийн биржид 16.23 цагийн үед тус бондын нэгжийн ханш нь 109.6 цент болж буурчээ. Энэхүү бондыг 2024 онд эргэн төлөх юм.