Иргэдийн төлөөлөл Засгийн газар хандсан тухайгаа өнөөдөр хэвлэлийн бага хурал хийж, мэдээллээ. Улс төрийн намын дарга, хуульч, өмгөөлөгчид хамтран иргэний хувиар Засгийн газарт хандсанаа мэдэгдэв. Тэд Ерөнхий сайд асан Ч.Сайханбилэгийн 2015 онд гаргасан 99 болон 123 дугаар захирамжтай холбогдуулан Ерөнхий сайд У.Хүрэлсүхэнд ханджээ.

Энэ тухай ИЗНН-ын дарга Ц.Ганхуяг "2015 оны 4 дүгээр сарын 16-ны өдөр хөрөнгө оруулагчтэй хийсэн хэлэлцээний дүнг үндэслэн Оюутолгойн далд уурхайн бүтээн байгуулалтын ажлын санхүүжилтийн төлөвлөгөөнд гарын үсэг зурах эрхийг Эрдэнэс Монгол, Эрдэнэс Оюутолгойн гүйцэтгэх захирал нарт олгосон тухай захирамжууд байна. Энэ захирамжууд нь Засгийн газрын хуралдааны журмын заалтыг зөрчсөн” хэмээн тайлбарлалаа. Өөрөөр хэлбэл Сангийн яам, Хуульзүйн яам, Гадаад харилцааны яам, Байгаль орчин ногоон хөгжлийн яамнаас санал авах ёстой. Гэтэл нэг ч яамнаас санал аваагүйгээр захирамж гаргасан хэмээн ярилаа.

Б.Учрал