Монголын сүү, сүүн бүтээг­дэхүүн үйлдвэрлэгч ууган компанийн нэг "Сүү” компани сүүлийн үед хөл хөдөлгөөн ихтэй байгаа гэнэ.

Учир нь тус үйлдвэр нь Улаанбаатар хотын ойр орчимд мал малладаг иргэдээс хямд өртөгөөр сүү худалдаж авах замаар сүүний хангалтаа хийдэг. Гэтэл сүүний хангалт хариуцсан лаборантууд нь гэрээт малчдаас сүүг багаар хэмжиж авах, төлбөр тооцооноос өөртөө завшсан хэрэг гарсан байна. Тодруулбал, 40 литрийн битонтой сүүг 38 литрээр тооцох, сарын эцэст малчдад төлбөр тооцоо шилжүүлсний дараа "Өөр хүний мөнгийг чиний тооцоон дээр нэмээд шилжүүлсэн байна. Энэ данс руу шилжүүлчих” гэдэг байжээ.

Эл үйлдэлтэй нь холбоотой гомдол тус үйлдвэрийн холбогдох албан тушаалтанд олон удаа ирсэн ч тодорхой арга хэмжээ авалгүй өнөөг хүрчээ. Харин "Сүү” ХК-ны толгой компани болох "Макс” группийн эзэн Д.Ганбаатар дотоод хяналт шалгалт чангаруулсан бөгөөд энэ хүрээнд цөөнгүй шалгалтыг хийсэн байна. Гэтэл тус үйлдвэрийн гурван лаборант олон удаагийн үйлдлээр их хэмжээний мөнгө хувьдаа шамшигдуулсан болзошгүй гэх хэрэг илэрчээ. Тиймээс дээрх ажилчдыг ажлаас нь халж, улмаар хууль хяналтын байгууллагад шалгуулахыг үүрэгдсэн байна.

Эх сурвалжийн хэлснээр тус үйлдвэр нь үйлдвэрлэж буй бүтээгдэхүүндээ хуурай сүү холидог нь дээрх хэрэг илрэхгүй олон жил болоход нөлөөлсөн гэсэн юм.

Үндэсний шуудан сонин