Букерын шагналыг Их Британийн зохиолч хүртлээ
Энэ жилийн Букерийн шагналыг /Man Booker Prize/ Их Британийн зохиолч Анна Бернс хүртлээ. Уг нэр хүндтэй шагналыг гардуулах ёслолын ажиллагаа Их Британийн нийслэл Лондон хотод мягмар гарагт болсон байна.
Анна Бернс "Сүү худалдагч” /"Milkman”/ романаараа уг шагналыг хүртжээ. Түүний зохиолд Умард Ирландад 1970-аад оны мөргөлдөөний үед амьдарч байсан нэгэн охины ёс суртахууны бэрх түвэгтэй байдлын тухай өгүүлдэг байна.
Их Британийн зохиолч, философич Энтони Аппиа тэргүүтэй нэр хүнд бүхий шүүгчдийн бүрэлдэхүүн шигшигдэж үлдсэн зургаан бүтээлээс Бернсийнхийг сонгожээ. Зургаан бүтээлийн гурав нь Перу болон Их Британийн зохиолчдынх байсан бол хоёр нь Америкийнх, нэг нь Канадынх байв.
Энэ жил дөрвөн эмэгтэй, хоёр эрэгтэй зохиолчийн бүтээлүүд шалгаран үлджээ.
Букерын шагналыг 1969 оноос хойш жил бүр олгож байгаа юм. Уг шагналын эзэн уламжлал ёсоор 50 мянган фунт стерлингийн /76,2 мянган ам.доллар/ мөнгөн шагнал авдаг. 2013 оныг хүртэл Букерын шагналыг Хамтын нөхөрлөлын орнуудын нэгд, Ирланд эсвэл Зимбабве улсад оршин суудаг зохиолчид олгодог байсан бөгөөд харин дараа нь шүүгчид бүтээлээ англи хэлээр бичиж, Их Британид хэвлүүлсэн бусад орны зохиолчдыг уг шагналд нэрээ дэвшүүлэхийг зөвшөөрчээ.
Сэтгэгдэл байхгүй байна.