Импортлогчид "Хулгайч муур шиг" баяр ёслолын үеэр үнээ нэмэх үзэгдэл манай улсад бараг уламжлал шахуу болоод удаж байна. Тэдгээрээс бүх барааны үнэд нөлөөлж чаддаг нь мэдээж нефт имдортлогчид. Он гарснаас хойш дөрвөн ч удаа үнээ нэмээд буй нефт импортлогчид Монгол Улс Газрын тосны үйлдвэртэй болох ажил эрчимжсэнтэй холбоотой бололтой.

Газрын тос нэрэх үйлдвэр барих асуудал олон жилийн турш яригдсан ч биелэлээ олоогүй байгаа нь цаанаа олон учир шалтгаантай гэдэг. Үүнээс хамгийн том шалтгаан нь шатахуун импортлогчид улстөрийн тодорхой бүлэглэлтэй холбоотой учраас хэмээн тайлбарлах нь олонтаа. Мөн олон жил улстөрчид шоу хийх зорилгоор шав тавьж ирсэн ч нэг ч үйлдвэр баригдаагүй болохоор иргэд олон нийт ч итгэхээ больсон. Тухайлбал, "Оюуны-Ундраа”-гийн С.Отгонбаяр 2004 онд УИХ-д нэрээ дэвшүүлэхдээ Налайхад нефть боловсруулах үйлдвэрийн шав тавьсан бол 2012 онд "Сод Монгол”-ын Ц.Анандбазар Дорноговь аймагт шав тавьсан. Үүний өмнө хойно шав тавих асуудал хэд хэд байдаг юм билээ. Үүнээс гадна улстөрчдийн "нутаг орноо, газар усаа” гэсэн хоосон хийрхэл нь хайгуулийн болон Газрын тос нэрэх үйлдвэрийн ажлыг гацааж байсан түүх ч бий.

Тэгвэл Дорноговь аймгийн Алтанширээ сумын нутагт Газрын тос нэрэх үйлдвэрийн шав тавьж Засгийн газар зоримог алхам хийсэн нь шатахуун импортлогчдын дургүйг илтэд хүргэснээр ийнхүү бинзений үнэ нэмэгдэх болсон талаарх шум цахим сүлжээнд өрнөв. Энэ нь ч магадлал өндөр. Шатахуун "импортлогчид Газрын тос нэрэх үйлдвэрийг эсэргүүцэж үнээ нэмжээ" ойлгож болохоор асуудал дэгдэв. Импортлогчид шатахууны үнэ нэмэхийн зэрэгцээ эртнээс яригдаж байсан хуурамч шатахууны асуудал ч хачир нэмэв.

Харин энэ удаад Монгол Улсын Засгийн газраас үйлдвэрийн ажлыг эрчимтэй эхлүүлж, Техник эдийн засгийн үндэслэлээ гаргачихсан, хөрөнгийн эх үүсвэрээ шийдчихсэн, зам барилгын ажил нь гараанаас гарч байгаа болохоор иргэд олон нийтийн итгэл сэргэж энэхүү ажлыг дэмжиж сууна. Нефть нэрэх үйлдвэр ашиглалтад орлоо бол нефть импортлогчид тэртээ тэргүй импортоо зогсооно. 

Уг нь энэхүү бүтээн байгуулалтыг эхлүүлсэн Засгийн газар нь тогтвортой байгаад, сонгуулийн үр дүнд шинээр Засгийн газар байгуулагдлаа ч Газрын тосны үйлдвэр барих ажлыг гацаалгүй барьж чадвал хугацаа ёсоор 2022 онд үйлдвэр барих ажил дуусах ёстой. Манай нөхцөлд шинээр Засгийн газар гарч ирэхээр өмнөх Засгийн газрынхаа хийж байсан зөв, буруу ямар ч ажлыг гацаадаг жишиг бий. Тэгэхээр энэ мэт томоохон төслийг гацаалгүй үргэлжүүлэх нь Монгол Улсад хэрэгтэй. Уг нь үндэсний хэмжээний том бүтээн байгуулалт эхлүүлсэн Засгийн газрыг үргэлжүүлэн ажиллуулаад эцсийг нь үзэх нь хамгийн зөв арга гэдэг ч манай нөхцөлд сонгуулийн үр дүнгээс хамаарах тул ямар ч арга байхгүй. Гагцхүү сонгогч олны итгэл, ирээдүйгээ харсан сонголт л үүнд тус болох учиртай.  

Угтаа бол манай улсад үйл ажиллагаа явуулж буй импортлогчидын унасан газар угаасан шороо нь монгол. Хэрэв худал бичиг баримт бүрдүүлчихээгүй л бол шүү дээ. Тэд бүгд л энэ газар шороон дээр уйлж, дуулж, унаж, боссон. Тэгэхээр импортлогчид маань эх орон нь нэг ч гэсэн үйлдвэртэй болохыг дэмжих нь зүйн хэрэг. Гэвч импортлогчид дотоодын зах зээл дээр дур зоргоороо үнэ тогтоодог монополь эрхээ хазаарлуулах вий гэхээс гадна Засгийн газарт шантааж үзүүлэх ямар ч хэрэггүй болох учраас ийн эсэргүүцэж байна уу гэх хардлага нийгэмд бий боллоо.