ЦЭХЭР ЦӨӨРӨМ ба СОХОР ТӨР!
Дархан-Уул аймгийн Хонгор сумын нутагт орших "Цэхэр цөөрөм" хэмээх байгалийн үзэсгэлэнт газрыг хэн нь үл мэдэгдэх томоохон хамгаалалттай хууль бус бүлэглэл 3 жилийн турш дөрвөн улирал дамнан ухаж, сүйтгээд дуусаж байгаа талаар мэдээлэл ирсээр байна!
Анх 2017 онд дээрх газарт 20 гаруй техник хэрэгсэлтэй хууль бус алт олборлогчид орж байгаль сүйтгэж байгаа талаар нэгэн иргэн цахим орчинд мэдээлэл тавьснаар олон нийт шуугьж, шаардаж байж Цагдаа, МХГ, аймаг сумын удирдлагууд очиж үйл ажиллагааг нь зогсоож, техник хэрэгслийг нь битүүмжилж хуулийн байгууллагад шилжүүлсэн ч өнөөдрийг хүртэл дээрх байгууллага, хүмүүст ямар шийтгэл оноож, төлбөр торгууль, хохирол төлүүлсэн эсэх, хураасан машин техникийг нь хэрхсэн талаар тодорхойгүй байсаар мартагдсан.
Нутгийн иргэдийн дундах яриа болоод зарим эх сурвалжийн мэдээлснээр бол Шарын гол сумын төвд алт ухаж, хэл ам болоод байсан тус сумын засаг дарга Д.Амарсанаагийн хүргэн А болон түүний ард аймгийн томоохон албан тушаалтнууд байдаг ба тухайн газарт албан ёсоор алт олборлох эрхийг авахаар яам, газраар бичиг баримт бүрдүүлэн хөөцөлдөж яваа тухай баттай мэдээлэл ч байдаг.
Гэвч хэдий МХГ, Цагдаагийн байгууллага хааж, лацдаж хориглосон ч 3 жил өвөл зунгүй олны нүднээс ил далд ухсаар байна. Урд шөнө гэхэд иргэний гомдлын дагуу шалгахад тухайн газарт хулгайн алт олборлогчид ажиллаж байсныг Шарын гол сумын цагдаагаас таслан зогсоосон байна. Энэ мэтчилэн нутаг орныг нь эзэнгүйчлэн баялгийг нь өдөр шөнөгүй зөөж, байгалийг нь хөрсөөр нь эргүүлэн сүйтгэж байхад Дарханы төр засгийн удирдлагууд сохор мэт суусаар байгаа нь тэднийг нэг уяанд холбогдсон гэх мэдээлэл үнэн байх магадлалтай байна!
Иргэдийг нь уут гурил, ууттай чихэрхнээр хуурчихаад байгалийг нь сүйтгэж, баялгийг нь цөлмөж, хотын газрыг нь зараад зогсохгүй ганц бүтэн үлдсэн хүүхдийн паркийг нь таллан зарах нь хэвийн үзэгдэл үү!
Сэтгэгдэл байхгүй байна.