Метамфетамин үйлдвэрлэж, наймаалсан Канадын иргэнд цаазын ял ногдуулах шийдвэрийг БНХАУ-ын шүүх мягмар гарагт гаргасан байна.

 

Фан Вэй нь энэ онд цаазын ял сонссон Канадын хоёр дахь иргэн юм. Мягмар гарагт өөр бусад 10 хүн ял сонссоны дунд гадаадын таван иргэн байжээ.  

Өнгөрсөн 12 дугаар сард "Huawei” компанийн өндөр албан тушаалтныг Ванкувер хотоос баривчилсантай холбоотойгоор Канад, Хятадын харилцаа муудаж эхэлсэн юм.

Бээжин цаазын ялыг дур зоргоороо ногдуулж буйг Канадын засаг захиргаа шүүмжлээд, Фан Вэйд өршөөл үзүүлэхийг хүссэн байна.

Өнгөрсөн нэгдүгээр сард Хятадын шүүх Канадын иргэн Роберт Ллойд Шелленбергт өмнө нь ногдуулсан 15 жилийн хорих ялыг хэт хөнгөн хэмээн үзэж, цаазын ял болгон чангатгасан билээ.

"Манай улс цаазын ялыг хүчтэй эсэргүүцдэг, бид үүнийг харгис хэрцгий, хүнлэг бус шийтгэл хэмээн үздэг бөгөөд энэ төрлийн ялыг аль ч улс оронд гүйцэтгэх ёсгүй" гэж Канадын Гадаад хэргийн сайд Кристиа Фриланд мягмар гарагт сэтгүүлчдэд мэдээлжээ. Мөн тэрбээр, ялангуяа Канадын иргэдэд цаазын ял ногдуулсанд бид маш их санаа зовниж байна гэж нэмж хэлсэн байна.

Мягмар гарагт хорих ял сонссон хүмүүсийн дунд нэг америк, дөрвөн мексик хүн байжээ. Тэд бүгд 2012 онд баривчлагдаж байсан аж.