Монголын зохиолчдын эвлэлээс жил бүр уламжлал болгон зохион байгуулдаг Эгшиглэнт эхийн хишигт яруу найрагч тодруулах "Болор цом–43” наадам өчигдөр /2025.11.26/ болж өнгөрлөө. Тус наадамд нийт 28 яруу найрагч шүлгээ дуудсанаас Н.Минжинсайхан "Үг” шүлгээрээ тэргүүн байрыг эзлэв. Дэд байрт Монголын зохиолчдын эвлэлийн шагналт, яруу найрагч Л.Торой шалгарсан бол гуравдугаар байранд "Болор цом”-ын эзэн яруу найрагч Д.Болдхуяг, дөрөвдүгээр байранд яруу найрагч Б.Эрдэнэ-Очир, тавдугаар байранд яруу найрагч Б.Ганхүрэл нар шалгарлаа. Тэргүүн шүлгийн эзэн яруу найрагч Н.Минжинсайханы сэтгэгдлээс хүргэе.

Яруу найрагч Н.Минжинсайхан:

-"Яруу найрагч хүн болж төрнө гэдэг бол их хувь зохиол юм. "Эгшиглэнт эх” Янжинлхамынхаа ариун мутраас адис хүртсэн сайхан үдэш байна. Анхны шүлгээ 2000 онд бичиж байлаа. "Болор цом” наадамд 15 дах жилдээ оролцож байна.

Сүүлийн жилүүдэд "Яруу найргийн үндэсний төв”-ийг тэргүүлж, өөрөө шүүж шударга сайхан наадам хийхийг зорьж явсан бол энэ жилийн наадамд оролцохдоо би "шүлэг бичих гэж төрсөн болохоос шүүгч хийх гэж төрөөгүй шүү дээ” гэж бодож шүлгээ өгсөн.

Энэ удаагийн "Болор цом”-ын эзэн болж зогсож байгаадаа туйлын их баяртай байна. Хамгийн түрүүнд уран зохиолын хайрт сайхан ах нар минь бодогдож байна. А.Эрдэнэ-Очир, Л.Ганзул гээд олон сайхан ах нар маань тэнгэрийн орноос харж баярлаж байгаа байх. Эцэст нь ээжийнхээ ачийг хариуллаа даа гэж бодогдож байна даа. Энэ жилийн хувьд түрүүлнэ гэж бодоогүй байсан. Би өөрөө шударга сайхан байх дуртай. Тийм ч зарчимтай хүн. Шударга сайхан шүүгээсэй билээ. Тэгвэл миний шүлэг эхний тавдцгаар байранд орно доо гэж бодож байсан. Үнэн шударга шүүсэн шүүгчдэдээ баярлалаа. Намайг цаг ямагт дэмжиж байдаг гэр бүл болон найз нөхөд уран зохиолд хайртай хэн бүхэнд баярлалаа”гэв.