АНУ-ын Шуудангийн алба тулааны урлагийн од, кино жүжигчин Брюс Ли болон алдарт боксчин Мохаммед Али нарын хөрөг бүхий марк гаргахаар болсноо мэдэгдэв. Хоёр тулаанчийг ид залуу байх үед тэдний халз тулааныг зохион байгуулах талаар яригдаж байсан боловч 1973 онд Брюс Ли цаг бусаар өөд болсноор энэ санаачилга бүтээгүй юм. Гэвч тэд 50 гаруй жилийн дараа ийнхүү шуудангийн маркан дээр уулзах болж байна. 1970-аад онд сайхь хоёр эр арьс өнгө, үндэс угсаагаар ​​ялгаварлан гадуурхах үзлийн саад бэрхшээлийг даван туулж, дэлхий даяар алдар цуугаа дуурсгасан одууд болсон юм. Брюс Ли 1971 онд "Их хаан" кинонд тоглосноор алдрын оргилд хүрч, удалгүй "Хилэнгийн нударга" зэрэг кинонд тулаанч эрийн дүрийг амжилттай бүтээснээр дэлхий дахиныг Хятадын тулааны урлагт хошууруулсан юм. Энэ удаа хэвлэгдэх маркан дээр түүний хамгийн сүүлд бүтээсэн "Үхлийн тоглоом" киноны дүрийг мөнхлөхөөр болжээ.

   1960 оны Ромын Олимпоос алтан медаль хүртэж, арьс өнгөөр ​​ялгаварлан гадуурхах үзлийн эсрэг дуу хоолойгоо өргөсөөр ирсэн Мохаммед Али мэргэжлийн боксын рингэнд 56 ялалт байгуулахдаа 36 удаад нь цэвэр ялж, тухайн цаг үеийнхээ төдийгүй түүхэн дэх хамгийн агуу боксчин болсон юм. Тэрбээр хүний ​​эрхийн төлөө хөдөлгөөнд идэвхтэй оролцдог байсан бөгөөд хамгийн сүүлд 1996 оны Атлантын Олимпын нээлтийн ёслолд оролцож, Олимпын бамбар асаасан билээ.