Австрийн Үндэсний зөвлөл /парламентын доод танхим/ Себастьян Курц тэргүүтэй Засгийн газартаа итгэл үзүүлсэнгүй. Энэ шийдвэрийг Австрийн Социал-демократ нам /52 депутат/, Австрийн эрх чөлөө нам /51 депутат/, JETZT нам /долоон депутат/ дэмжжээ.

 

Австрийн парламент Канцлераа огцруулсан тохиолдол 1945 оноос хойш гарч байгаагүй юм. Курцэд итгэл үзүүлэх эсэх асуудлыг Австрийн сөрөг хүчин Засгийн газрын хямрал үүссэнтэй холбоотойгоор тавьсан байна. Дэд Канцлерын албан тушаалыг хашиж байсан, Австрийн эрх чөлөө намын дарга Хайнц-Кристиан Штрахегийн дуулиан шуугиан тарьсан дүрс бичлэг нийтлэгдсэний дараа ийм хямрал үүсжээ.

Штрахе огцорсон бол Курц Засгийн газрын эвсэлд Австрийн эрх чөлөө намтай цаашид хамтран ажиллахаас татгалзаж, хугацаанаас өмнө парламентын сонгууль зарлажээ. Албан тушаалаасаа огцорсон Австрийн эрх чөлөө намын сайд нарын оронд Курц өөрийн намын төлөөлөгчид болон шинжээчдийг томилсон нь сөрөг хүчнийхний дургүйцлийг төрүүлсэн байна.

Курцыг мягмар гарагт үүрэгт ажлаас нь чөлөөлнө гэдгийг Австрийн Ерөнхийлөгч Александр ван дер Беллен мэдэгджээ. Австрийн Канцлерын үүргийг түүний орлогч, Сангийн сайд Хартвиг Лёгер гүйцэтгэх аж.