ЗГХЭГ-ын дэд дарга Д.Батбаатар нүүрсний хоёр компанитай, хөшигийн хөндийд 173 га газартай, хятад руу хууль бусаар мах гаргадаг үйлдвэртэй
ЗГХЭГ-ын гурван дэд даргын нэг Дааданхүүгийн Батбаатарын хууль бусаар "хагартлаа" баяжсан ноцтой баримтыг дэлгэж байна. Тэрбээр Хөшигийн хөндийд гурван компанийн нэр дээр нийт 173 га газартай, "Эрдэнэс тавантолгой" ХК-тай гэрээлж, Хятад руу нүүрс зөөдөг хоёр компанитай, Эмээлтэд хууль бусаар мах боловсруулж, Хятад руу гаргадаг үйлдвэртэй нэгэн ажээ. Мөн Д.Батбаатар төрийг "тонох" зорилгоор өөрийн төрсөн дүү Д.Батчулууныг ИНЕГ-ын дэд дарга, төрсөн ах Д.Баянжаргалынхаа том хүү Б.Оргилыг Буян-Ухаа нисэх онгоцны буудлын дэд дарга, бага хүү Б.Санчирыг "Эрдэнэс тавантолгой" ХК-ийн Худалдан авалтын хэлтсийн дарга гэхчилэн төрийн том албан тушаалуудад томилуулсан байна.
ЗГХЭГ-ЫН ДЭД ДАРГА Д.БАТБААТАР ХӨШИГИЙН ХӨНДИЙД ЭЗЭН СУУЖ, ШИНЭ НИСЭХ БУУДЛЫН ХАЖУУД ГУРВАН КОМПАНИЙН НЭР ДЭЭР НИЙТ 173 ГА ГАЗАР ЭЗЭМШДЭГ БОЛЖЭЭ
ЗГХЭГ-ын дэд дарга Д.Батбаатарын төрсөн дүү Д.Батчулуун 2015 оны аравдугаар сард ИНЕГ-ын дэд даргаар томилогдсон. Үүнээс сарын дараа буюу 2015 оны арваннэгдүгээр сард Д.Батбаатар өөрийн нэр дээр "Мошеа-эко” ХХК-ийг байгуулсан. Мөн "Мошеа-эко” ХХК-ийнхаа доор "Мошеа эко энержи” ХХК, "Мошеа электрик энержи” ХХК, "Чингис хаан интернэшнл аэрпорт ложистик” ХХК гэх охин компаниуд байгуулсан байгаа юм. Улмаар Д.Батбаатар 2016 оны тавдугаар сард төрсөн дүү Д.Батчулуунаараа дамжуулан "Мошеа электрик энержи” ХХК-ийнхаа нэр дээр Хөшигийн хөндий дэх ИНЕГ-ын эзэмшил газраас 100 га газрыг шилжүүлж авчээ.
Төрсөн ах Д.Батбаатартаа Хөшигийн хөндийд 100 га газар "бэлэглэсэн” Д.Батчулуун 2017 онд ИНЕГ-ын дэд даргын албан тушаалаас чөлөөлөгдсөн. Гэтэл 2018 онд Д.Батбаатар, Д.Батчулуун хоёрын төрсөн ах Д.Баянжаргалын том хүү Б.Оргил нь Буянт-Ухаа нисэх онгоцны буудлын дэд даргаар томилогдсон байгаа юм. Д.Батбаатар төрсөн ахынхаа хүү Б.Оргилыг ийн дэд дарга болгосон цаад зорилго нь дахиад л Хөшигийн хөндийн газартай холбоотой байж болзошгүй. Тодруулбал, Д.Батбаатар Б.Оргилыг дэд даргаар ажиллах хугацаанд буюу 2018-2020 онд "Мошеа эко энержи” ХХК-ийнхаа нэр дээр Хөшигийн хөндийд есөн байршилд нийт 66.5 га газар, "Чингис хаан интернэшнл аэрпорт ложистик” ХХК-ийнхаа нэр дээр Хөшигийн хөндийд 3.0 га газрыг тус тус өөрийн болгосон байгаа юм. Товчхондоо, Д.Батбаатар өөрийн төрсөн дүү Д.Батчулуун, төрсөн ах Д.Баянжаргалынхаа хүү Б.Оргил нарыг 2015-2020 онд нисэх онгоцны буудлын дэд даргаар цувруулж ажиллуулаад, ИНЕГ-аас нийт 173 га газар салгаж авч чаджээ гэсэн үг.
Тайлбар: ЗГХЭГ-ын дэд дарга Д.Батбаатар, төрсөн дүү, ИНЕГ-ын дэд дарга/2015-2017/ Д.Батчулуун, төрсөн ах Д.Баянжаргалын хүү, ИНЕГ-ын дэд дарга/2018-2020/ Б.Оргил
Засгийн газраас Хөшигийн хөндий дэх шинэ нисэх буудлыг түшиглэн дагуул хот байгуулахаар төлөвлөж буй. Үүнийг дагаад Хөшигийн хөндийн, тэр тусмаа шинэ нисэх буудалтай хаяа залгаа газруудын үнэ тэнгэрт хадаж эхэлсэн. Ингэж харвал, ЗГХЭГ-ын дэд дарга Д.Батбаатарын Хөшигийн хөндий дэх 173 га газрын үнэ хэдэн арван тэрбум төгрөгөөр үнэлэгдэнэ гэсэн үг.
ЗГХЭГ-ЫН ДЭД ДАРГА Д.БАТБААТАР ТӨРСӨН АХ Д.БАЯНЖАРГАЛЫНХАА ХҮҮ Б.САНЧИРААР ХУВИЙН КОМПАНИУДАА УДИРДУУЛЖ БАЙГААД ӨНГӨРСӨН ОНД "ЭРДЭНЭС ТАВАНТОЛГОЙ” ХК-ИЙН ХУДАЛДАН АВАЛТЫН ХЭЛТСИЙН ДАРГА БОЛГОЖЭЭ
ЗГХЭГ-ын дэд дарга Д.Батбаатар дээр дурдсан "Мошеа-эко” ХХК, "Мошеа эко энержи” ХХК, "Мошеа электрик энержи” ХХК, "Чингис хаан интернэшнл аэрпорт ложистик” ХХК-уудаа 2021 он хүртэл өөрийн нэр дээр эзэмшиж байсан. Харин 2021 онд ЗГХЭГ-ын даргаар томилогдохдоо өөрийн төрсөн ах Д.Баянжаргалын хүү Б.Санчирын нэр дээр шилжүүлсэн байгаа юм.
Хамгийн ноцтой нь, өнгөрсөн онд УИХ-ын гишүүн асан Т.Аюурсайхан, "Эрдэнэс тавантолгой” ХК-ийн Гүйцэтгэх захирал асан Б.Ганхуяг нарын "нүүрсний хулгай”-н схем ил болсон. Улмаар Т.Аюурсайхан, Б.Ганхуяг хоёрын гар хөлүүд болох "Эрдэнэс тавантолгой” ХК-ийн газар, хэлтсийн дарга нарыг албан тушаалаас нь чөлөөлж, "нүүрсний хулгай”-н хэргээр шалгаж эхэлсэн. Тэдний нэг нь "Эрдэнэс тавантолгой” ХК-ийн Худалдан авалтын хэлтсийн даргаар ажиллаж байсан, УИХ-ын гишүүн Т.Аюурсайханы туслах асан Б.Отгонжаргал. Тэгвэл Б.Отгонжаргалыг "Эрдэнэс тавантолгой” ХК-ийн Худалдан авалтын хэлтсийн даргаас чөлөөлмөгц түүний оронд ЗГХЭГ-ын дэд дарга Д.Батбаатарын хувийн компаниудыг хариуцдаг, төрсөн ахынх нь хүү Б.Санчир томилогджээ.
.JPG)
Тайлбар: ЗГХЭГ-ын дэд дарга Д.Батбаатар, төрсөн ах Д.Баянжаргал, түүний хүү Б.Санчир
ЗГХЭГ-ЫН ДЭД ДАРГА Д.БАТБААТАР ХҮРГЭН Ш.БОЛОРЫНХОО НЭР ДЭЭР "ЛЮКС ТРАНС” ХХК, "НЬЮ КАРАВАН” ХХК-УУДЫГ БҮРТГҮҮЛЖ, "ЭРДЭНЭС ТАВАНТОЛГОЙ” ХК-ААС ХЯТАД РУУ НҮҮРС ЗӨӨЖ БАЙНА
ЗГХЭГ-ын дэд дарга Д.Батбаатар төрсөн ах Д.Баянжаргалынхаа хүү Б.Санчирыг "Эрдэнэс тавантолгой” ХК-ийн Худалдан авалтын хэлтсийн дарга болгосны учир нь Д.Батбаатар өөрөө нүүрсний бизнестэй ажээ.
Тодруулбал, Д.Батбаатар 2010 онд тухайн үеийн Ерөнхий сайд Сү.Батболдын зөвлөхөөр ажиллаж байгаад Өмнөговь аймаг дахь Засгийн газрын Бүрэн эрхт төлөөлөгчөөр томилогдож очсон. Тэнд очсоныхоо дараа Д.Батбаатар "Нью караван" ХХК гэх нүүрс тээврийн компани байгуулж, мөн л төрсөн ах Д.Баянжаргалынхаа хүү Б.Санчирын нэр дээр бүртгүүлсэн аж. Харин Б.Санчир өнгөрсөн онд "Эрдэнэс тавантолгой” ХК-ийн Худалдан авалтын хэлтсийн даргаар томилогдохдоо "Нью караван” ХХК-ийг Шижирбаатарын Болорт шилжүүлсэн байна. Судлаад үзвэл, Ш.Болор нь ЗГХЭГ-ын дэд дарга Д.Батбаатарын төрсөн дүү Д.Байгалмаагийн нөхөр ажээ. Мөн Ш.Болор нь 2020 оноос хойш "Люкс транс” ХХК-ийг эзэмшиж байгаа аж. Хамгийн ноцтой нь, "Нью караван” ХХК болон "Люкс транс” ХХК-ууд нь одоо ч "Эрдэнэс тавантолгой” ХК-тай гэрээ байгуулж, Гашуунсухайт-Ганцмод боомтоор нүүрс зөөж буй ажээ.
ЗГХЭГ-ЫН ДЭД ДАРГА Д.БАТБААТАРЫН ТӨРСӨН ДҮҮ Д.БАЙГАЛМАА ЭМЭЭЛТЭД МАХНЫ ҮЙЛДВЭРТЭЙ БӨГӨӨД ХЯТАД РУУ ХУУЛЬ БУСААР МАХ ГАРГАСАН ҮНДЭСЛЭЛЭЭР ҮЙЛДВЭРЭЭ ЛАЦДУУЛЖ БАЙЖЭЭ
Д.Батбаатарын нүүрсний компаниудыг удирддаг Ш.Болорын эхнэр буюу Д.Батбаатарын төрсөн дүү Д.Байгалмаа нь "БӨЖТ” ХХК-ийг эзэмшдэг аж. Судлаад үзвэл, "БӨЖТ” ХХК нь Сонгинохайрхан дүүргийн XXI хороо буюу Эмээлтэд 10 га газартай, мах боловсруулах үйлдвэртэй компани ажээ.
Тайлбар: ЗГХЭГ-ын дэд дарга Д.Батбаатарын төрсөн дүү, "БӨЖТ" ХХК-ийн захирал Д.Байгалмаа, хүргэн, "Нью караван" ХХК, "Люкс транс" ХХК-уудын захирал Ш.Болор
Хамгийн ноцтой нь, өнгөрсөн 2022 оны есдүгээр сард МХЕГ-аас Эмээлтийн махны үйлдвэрүүдэд гэнэтийн шалгалт хийж, 20 компанийн үйл ажиллагааг зогсоож, үйлдвэрийг нь лацдаж байв. Тухайн 20 компанийн нэг нь Д.Батбаатарын төрсөн дүү Д.Байгалмаагийн "БӨЖТ” ХХК. "БӨЖТ” ХХК нь мах экспортлох эрхгүй атлаа их хэмжээний мах бэлтгэж, Хятад руу гаргаж байсан нь МХЕГ-ын шалгалтаар илэрсэн. Улмаар тус компанийн агуулахаас 541 тонн мах хураан авч, устгалд оруулжээ. Эмээлтийн махны үйлдвэрүүдийн асуудлыг Ардын нам анхаардаггүй, хариуцлага тооцдоггүй жинхэнэ шалтгаан нь тухайн үйлдвэрүүдийн ард Д.Батбаатар мэтийн томчууд байдаг аж.
Бид дараагийн дугаартаа ЗГХЭГ-ын дэд дарга Б.Ганбат, У.Бямбасүрэн нарын ноцтой баримтыг дэлгэх болно.
Сэтгэгдэл байхгүй байна.