Монголын "Шар гэгээ" уран сайхны кино Австралийн Перт хотноо зохион байгуулсан олон улсын кино наадмын "Шилдэг кино" шагнал хүртжээ. Найруулагч Б.Батдэлгэрийн бүтээл "Шар гэгээ” уран сайхны кино өнгөрсөн 2023 оны аравдугаар сард үзэгчдийн хүртээл болж, албан ёсны нээлтээ хийсэн юм. Ийнхүү "Шар гэгээ" уран сайхны кино олон улсын наадмаас тав дахь шагналаа хүртлээ.

Төрийн шагналт, Соёлын гавьяат зүтгэлтэн Ш.Гүрбазарын зохиолоос сэдэвлэсэн тус дэлгэцийн бүтээл 15 дахь удаагийн "Улаанбаатар” олон улсын кино наадмын шилдэг гурван төрөлд шалгарч, "Хангарьд" цомын эзэн болохоос гадна "Мөнгөн мод” наадмын шилдэг кино урлагийн бүтээл шагналыг хүртсэн байдаг.

Харин уран сайхны киноны найруулагч Б.Батдэлгэрийн хувьд Ойрад театр болон Архангай аймгийн Хөгжимт драмын театр зэрэг хөдөө орон нутгийн театруудад 10 гаруй жил ажилласан уран бүтээлч бөгөөд найруулагчийнхаа анхны дебютүүдээ амжилттай хийсэн түүнийг мэргэжил нэгтнүүд нь үнэлж байв.