2015 оны эхний таван сард БНХАУ-ын нүүрсний нийт импорт 83.2 сая тонн болсон нь өнгөрсөн оны мөн үетэй харьцуулахад 38.4 хувиар буурсан дүн болж байна. Индонез улс БНХАУ-д 32 сая тонн нүүрс нийлүүлж, нийлүүлэлтээрээ тэргүүлжээ. Энэ нь нүүрсний экспортоор тус улс эдийн засагтаа нэг тэрбум 622 сая ам.доллар төвлөрүүлж чадсан гэсэн үг ажээ.

Зөвхөн тавдугаар сард л гэхэд Индонез улс БНХАУ-д 5.2 сая тонн нүүрс гаргасан байна. Араас нь

• Австрали улс 1-5 дугаар сард нийт 27.4 сая тонн нүүрс БНХАУ-д экспортолсон бол
• БНАСАУ 7.5,
• ОХУ 6.7 сая тонн нүүрс нийлүүлжээ.

Ашигт Малтмалын Газрын мэдээлснээр тавдугаар сарын үзүүлэлтээр Монгол Улс БНХАУ-д 23.7 сая ам.долларын үнийн дүн бүхий 593.9 мянган тонн нүүрс нийлүүлж, зургаа дахь том нийлүүлэгч орон болсон байна.

Оны эхнээс өссөн дүнгээрээ Монгол Улсаас БНХАУ-д нийлүүлсэн нүүрсний хэмжээ 5.7 сая тонн болжээ. Ингэснээр нүүрсний экспортоос орсон мөнгөн урсгал 225.5 сая ам.доллар болсон байна.

Нэг тонн нүүрсний ханшийг эдгээр үзүүлэлт дээр тулгуурлан тооцоолбол дундаж үнэ нь 38.9 ам.доллар болж байгаа аж. Монгол Улс өнгөрсөн оны дүнгээр БНХАУ-ын нүүрсний нийт импортын зургаан хувийг бүрдүүлж байжээ.

М.Дэлгэрмаа